Membru Parlamentu Nasionál husu governu atu investe iha modalidade desportivu liu-liu Boxing hodi promove joven sira-nia talentu.
Deputadu António Doutel Sarmento dehan, desportu Boxing iha Timor-Leste komesa hahú mudansa ba oin husi Timor-Leste ba ona to’o Internasionál.
Nia dehan, atu dezenvolve liu tan governu tenke tau osan, tanba sira ba tuir kompetisaun ne’e la’ós lori individual ka grupu nia naran, maibé reprezenta Timor-Leste.
“Ita husu governu atu investe ba iha desportu liu-liu Boxing, investe ekipamentu modernu hodi promove liutan joven sira-nia talentu, tanba desportu ne’e mak lori Timor-Leste partisipa iha kompetisaun nivel Internasionál,” nia dehan.
Nia dehan, Boxista Timoroan sira hatudu ona kualidade tékniku no táktiku profesionál iha Boxing, tanba ne’e presiza governu atu investe no dezenvolve liutan iha futuru.
“Ha’u aparesia tebes ba ita-nia boxista Delio ho Daniel ne’ebé mak sai kampionatu iha eventu Holywings Sport Show Bali foin lalais,” Deputadu Sarmento dehan iha reuniaun plenária iha Parlamentu Nasionál.
Entretantu Ministru Juventude Desportu Arte no Kultura (MJDAK) Nelio Isaac Sarmento dehan, aparesia tebes ba prestasaun boxista na’in rua husi klube El-Matadór, Delio Mouzinho no Deniel de Assis Belo, ne’ebé sai vitória iha kompetisaun eventu Holywings Sport Show (HSS), iha Bali Indonézia.
“Husi boxista na’in rua nia vitória ne’e sira komesa hatudu ona sira-nia prestasaun ba iha profesionál maibé presiza dezenvolve liutan iha eventu sira tuir mai,” nia salienta.
Nia dehan, desde inisiu governu kria de’it kondisaun ba sira iha Amatir, no sira hetan prestasaun iha Amatir, oras ne’e sae ba profesionál, no governu nafatin apoiu no hodi lori ba kompete iha nivel internasionál.
“Husu nafatin ba boxista na’in rua atu kontinua prepara an hodi no disiplina iha treinu no disiplina iha sira-nia an rasik hodi kontinua ba oin, tanba loron ruma sira sei ba to’o iha Amérika,” MJDAK Isaac informa.
Nia mós husu ba boxista junior sira atu nafatin disiplina no sériu iha treinu no tuir nafatin eventu sira ne’ebé Governu kria, nune’e bele sai profesional hanesan ho boxista Delio ho Deniel.
