Diretór Asosiasaun Asaun Difisiensia Mudansa Ba Futuru (A’ADMF) Martino da Costa hateten, A’ADMF harii ho hanoin ida atu ajuda hasa’e abilidade joven sira-nian liuhusi kursu sira iha área neen (6).
“Asosiasaun ida-ne’e ha’u harii iha tinan 2018, liuhusi motivasaun balu ne’ebé mai husi familia rasik, atu fahe esperiénsia ne’ebé iha ba maluk joven sira, hodi hasae sira-nia koñesimentu liuhusi formasaun sira hanesan Lian Inglés, Portugues, Lian Korea, Administrasaun, Komputador no Lideransa,” dehan Diretór A’ADMF Costa.
Nia dehan, asosiasaun ida-ne’e hetan sertifikadu husi SEFOPE, tanba ne’e joven sira ne’ebé aprende iha A’ADMF bele hetan oportunidade iha ne’ebé deit liuliu ba iha nasaun seluk.
“Iha asosiasaun ida-ne’e nia membru hamutuk 180 no dadaun ne’e membru atividade hamutuk 26. Sira mak durante ne’e apoiu formasaun,” nia dehan.
Iha sorin seluk Simão Bianco da Costa hanesan membru ativu ida iha A’ADMF, dehan
hanesan joven sente kontenti banhira partisipa iha asosiasaun sira tanba bele hanorin ita oinsa fahe ideia no aprende siensia barak.
“Ha’u hanesan joven ida ne’ebé halao estudu iha UNTL no fahe mos tempu hodi partisipa iha asosiasaun A’ADMF sente orgullu tebes tanba ha’u mos iha objetivu ida katak husi asosiesaun ita bele haforsa ideia ba malu, halao atividade ka programa ne’ebé iha no hanesan joven ida kontinua halao ho buat ne’ebé ita iha hodi abitua ambiente foun ho konesimentu foun hosi aplika iha komunidade no fatin ne’ebé ita hetan oportunidade ba”, dehan atuál estudante Departamentu Dezenvolvimentu Komunitaria, Fakuldade Siensia Sosiais-UNTL.
Nia salienta, liuhusi asosiasaun bele hetan koñesimentu foun hodi partilla idea ba malu hodi hatoman malu atu konese ambiente foun.
“Iha Asosiasaun ida-ne’e buat lubuk ida maka ha’u hetan hodi aumenta ha’u-nia esperiénsia maka liuhusi fahe ideia, formasaun sira, hetan kolega foun husi munisípiu oioin, fó formasaun iha munisipiu no bele halo ha’u oinsa hamrik iha ema barak nia oin nune’e prepara ha’u-nia an sai joven ne’ebé diak no iha koñesimentu hodi aplika iha future,” nia haktuir.
Simão hateten, ba joven sira labele lakon vontade no esperitu hodi aprende, tanba joven maka esperansa ema lubuk nian tenke fahe tempu partisipa iha atividade estra sira, tanba hakarak iha esperiénsia presiza buka rasik.
