Ministériu Edukasaun (ME) aplika teste espesiál ba eis-profesór kontratadu tinan 2023 nian hodi fó oportunidade ba sira tama iha sistema ensinu nasionál tuir dekretu lei númeru 31/2023 31 de maiu.
Porta-Voz Ministériu Edukasaun Filipe Rodrigues, dehan, teste espesiál ne’e hanesan opsaun ida hodi fó oportunidade ba eis-profesór sira ne’e hodi bele sai manorin iha eskola sira tuir kuadru pesoál ne’ebé iha.
Nia dehan, obsaun este espesiál ne’e tuir konkordansia entre eis-profesór kontratadu tinan 2023 no Ministériu Edukasaun liuhusi diálogu ne’ebé realiza iha Ministériu Edukasaun foin lalais.
“Ita aplika teste espesiál ba eis-profesór kontratadu tinan 2023 nian hodi fó oportunidade ba sira tama iha sistema ensinu nasionál hodi koloka fali ba eskola sira ho razaun katak eis-profesór hirak ne’e dedika ona sira-nia an ba prosesu aprendizajen iha eskola,” nia hatete.
Nia dehan, teste ne’e sei hala’o de’it ba eis-profesór kontrata iha 2023 ne’ebé prienxe rekizitu atu tama iha karreira dosente nian, iha inísiu, sei hala’o ba Ensinu Sekundáriu Jerál no Tékniku-Vokasionál, tuir mai aplikasaun ba Ensinu Báziku, tuir nesesidade.
“Preparasaun, Ministériu Edukasaun sei fornese matrix estudu nian ida ho konteúdu ne’ebé kobre iha ezame, nune’e kandidatu sira bele prepara no hetan rezultadu ne’ebé di’ak no tama iha karreira dosente, ministériu halo ida ne’e hodi solusaun problema ba eis-profesór kontratadu sira,” nia informa.
Entretantu Porta-Voz ba Eis-Profesór Kontratadu tinan 2023, Agostinho Pinto hatete, Profesór Kontratadu-2023, desidi ona atu partisipa iha teste espesiál bolsa kandidatu ne’ebé sei loke husi Ministériu Edukasaun, maibé presiza halo tán diskusaun balun liga-ba kontribuisaun no dedikasaun prefesór kontratadu 2023 nian, ne’ebé durante ne’e sira kontribui tinan naruk ona.
“Ami desidi ona katak, ami sei partisipa teste espesiál bolsa kandidatu ne’e, maibé ita sei iha diskusaun balun liga-ba kontribuisaun no dedikasaun profesór sira-nian, tanba sira kontribui ona ba estadu durante tinan naruk nia laran, hafoin sira hetan direitu kontratu iha Governu Konstitusionál da-8 hodi foti sira-nia estatutu voluntáriu ba ajente administrasaun públika,” dehan.Aleinde ne’e total husi eis-profesór ne’ebé mak atu partisipa iha teste ne’e kuaze 300 resin.
