Governu Ministériu Justisa no Komisaun Funsaun Públiku (CFP) rekruta tan guarda prizionál hamutuk 74 hodi koloka ba prizaun tolu iha Timor-Leste hanesan, Prizaun Becora, Suai no Gleno hodi kompleta problema rekursu umanu ne’ebé sei menus.
Ministériu Justisa Sérgio de Jesus Fernandes da Costa Hornai dehan, rekrutamentu ba guradas prizionál hirak ne’e hodi kompleta tan ba prizaun tolu ne’e, tanba rekursu umanu iha prizaun menus kauza husi balun moras no balun mós mate ona.
“Ita rekruta foun fali guarda prizionál hamutuk 74 hodi koloka ba prizaun tolu hanesan, Becora, Suai no Gleno hodi bele rezolve problema menus rekursu umanu ne’e,” nia hatete.
Nia dehan, servisu ne’e importante tebes, tanba sira sei jere ema lubuk oan ida ne’ebé mai ho mentalidade ida ne’ebé violentu, frustradu, tanba sira suspeita hela ba prosesu ba asaun kontra ordem públiku estadu nian, ilisitu ruma, ka krime ruma sira tenke ba iha fatin ida ne’ebé sertu atu izola hodi nune’e hodi bele hadia.
“Guarda Prizionál sira ne’ebé simu ona tomada de pose ne’e funsaun ne’ebé mak sira atu halo primeiru tenke iha korajen, kbiit, no iha koñesimentu ida klean atu bele hasoru ema lubuk ne’ebé mai ho karakteristika ne’ebé diferente,” Ministru Justisa Hornai dehan.
Nia dehan, guradas prizionál foun hirak ne’e sei iha formasaun hodi eleva sira-nia koñesimentu no mental hodi bele hasoru dezafiu sira ne’ebé mak iha.
“Ita husu mós atu servisu kumpri de’it ba lei no ordem hodi servisu povu no estadu ida-ne’e, serviau ho disiplina,” nia salienta.
Entretantu Prezidente Komisaun Funsaun Públiku Agustinho Letêncio de Deus dehan, guradas prizionál hirak ne’e liuhusi prosesu rekrutamentu, teste no entervista.
“Ita foku uluk ba guradas prizionál, tanba ida-ne’e setor prinsipál, prizaun no Justisa ita remata ona, tuir mai ita sei foku fali ba setor saúde no gurda florestal, depois ita sei hakatak ba setor jerál,” nia dehan.Nia dehan, tanba ne’e husu ba guarda prizionál foun hirak ne’e tenke hatudu profisionál, hatudu komportamentu di’ak hodi halo tratamentu dignu ba prizioneriu sira.
