Xefe suku Matai, postu-administrativu Maucatar, munisipiu Covalima Nuno José M. Pereira hatete, tempu ona atu jerasaun foun sira hodi prepara an no bele aprende sai lideransa ba nasaun Timor-Leste, tanba sira maka sei sai joven kontinuadór nasaun nian.
“Husu ba joven sira atu prepara an hodi partisipa iha formasaun sira-ne’ebé iha ho valor ba imi-nia an liuliu ba formasaun lideransa nian, tanba imi maka sei troka no imi maka esperansa foun nasaun nian hodi haree asuntu sira hotu ne’ebé presiza atu dezenvolve ho pensamentu ne’ebé joven,” Dehan xefe suku Nuno.
Nia hatutan, iha joven barak hahú aprende sai lideransa hanesan xefe suku barak maka idade sei joven, ida-ne’e hatudu ona katak prepara ona jerasaun foun atu sai lideransa ba futuru.
“Ita haree agora xefe suku sira mesak joven deit, ida-ne’e hatudu ona demokrasia no fó ona liberdade ba jerasaun foun sira atu prepara an hodi hadia no prepara sira atu sai lideransa kualidade ba futuru liuliu ba nasaun Timor-Leste,” tenik nia.
Nia akresenta, tempu ona atu joven sira prepara an ho di’ak no partisipa iha formasaun lideransa sira oinsa bele prepara an hodi lidera iha futuru.
“Husu ba joven sira atu prepara an ho di’ak no partisipa iha atividade importante sira liuliu formasaun lideransa sira oinsá bele aumenta imi-nia koñesimentu, abilidade no mentalidade hodi prepara an ba Timor-Leste iha futuru, tanba imi maka sei troka lideransa tuan sira hodi kontinua dezenvolve rai ida-ne’e”, akresenta nia.
Iha fatin seluk Koordenadór ba Estudante Hadomi Natureza (ESHANA) iha Universidade Nacional Timor Lorosa’e (UNTL) Inocencio M.C de Deus dehan, Timor-Leste presiza joven no estudante sira oinsá sai lideransa ba futuru, tanba sira maka nasaun nia esperansa.
“Ita-nia nasaun presiza atu hanorin di’ak liutan estudante no joven sira kona-ba lideransa. Hanesan iha ha’u-nia esperiénsia agora simu knaar nu’udar lideransa iha ami-nia organizasaun ESHANA.
Ne’e oportunidade ne’ebé hetan nu’udar lidera ho idade joven sente kontenti tebes, tanba ne’e hahú prepara ona lideransa ba jeransaun foun nasaun nian,” dehan Koordenadór Inocencio.
