Durante tinan 2024 Komisaun Funsaun Públiku (CFP,) demite funsionáriu públiku hamutuk na’in sanulu (10), tanba kontra Lei Funsaun Públika nian.
Prezidente Komisaun Funsaun Públiku (CFP) Agustinho Letêncio de Deus dehan, iha tinan 2024 ne’e funsaun públika aplika sasaun disiplinár hodi demite funsionáriu públika na’in sanulu (10) ne’ebé mak hala’o servisu latuir lei haruka.
“Tinan 2024 ne’e ita demite funsionáriu públiku na’in 10,” nia dehan.
Nia dehan, funsionáriu públiku na’in 10 ne’e viola lei funsaun públiku hanesan, abandona servisu, utiliza patrimóniu estadu nian ba atividade privadu no balun husik hela servisu hodi ba servisu iha rai liur.
“Ita-nia funsionáriu na’in 10 ne’e lista aprezenta husi ministériu sira ne’ebé mak durante ne’e sira servisu ba,” Prezidente CFP Letêncio dehan iha Ministériu Justisa Colmera, Díli.
Nia dehan, funsionáriu públiku na’in 10 ne’e balun demite husi kargu no balun demite husi servisu fatin.
“Husu ba funsionáriu públiku ka ajente administrasaun estadu nian, tenke servisu ho disiplina kumpri regulamentu sira hodi servi povu no rai ida ne’e labele viola regulamentu sira,” nia husu.
Entretantu Deputada Angelina Sarmento dehan, funsionáriu públiku balun la servisu ho professional, tanba uza tempu barak hodi halimar telefone no tur iha restorante no kafetaria sira ne’ebé besik.
“Ita haree sira abandona servisu, no ba tur iha fatin hirak ne’e lori tempu naruk depois oras to’o sira fila ba uma,” nia hatete.
Nia dehan, Komisaun Funsaun Públiku (CFP) tenke kontrolu hahalok sira-ne’e husi funsionáriu públiku sira, tenke aplika sansaun disiplinar ba sira ka demite.
