“Ami komprende diak materia sira ho lian Portugues. Ne’e hatudu katak ami prontu atu tuir prosesu aprendisazen ho lian Portugues iha Ensino Superior,” hateten Estudante Melkianos Da Costa Berek, foun lalais iha Ministerio Educasaun (ME), iha Vila Verde, Dili
Tuir Estudante Bere katak se karik sira halo prosesu aprendisazen ho lian Portugues ba tinan barak ona mak sira ba fali iha Ensino Superior mak ho fali lian Melayu (Indonesia) ka lian seluk ida ne’e sai fali difikuldade bo’ot ida ba sira.
“Atu hasae ami nia kapasidade ba ami buat ne’ebe ami kumpreenda mak ho lian Portugues entau se Universidade hanorin ho lian Portugues hau hanoin ida ne’e sei sai diak liu tan,” estudante ne’e hateten.
Estudante ne’e mos hateten tan katak Governo tenki renova fila fali kona ba ano lecttivo 2011 ninian ne’e ba 2012 ba tamba sira ne’ebe agora remata iha ano lectivo ida ne’e mak sai primeira jerasaun ho lian Portugues ne’ebe sei estuda iha nivel Superior entao Governo sira tenki kopera ho Nasaun koalia lian Portugues sira atu bele hatama livru barak liu ho lian Portugues.
Tuir Dosente UNTL-Instituto Nasional Linguistica (INL), Jose Luis Da Silva, hateten katak maske estudante sira prontu ona maibe dosente sira seidauk pronto hanorin ho lian Portugues.
“Ami Dosente sira hanorin iha Unversidade sira rasik la dominan Portugues maibe dosente sira ne’ebe mak iha Universidade barak domina mak sistema hanorin educasaun ho lingua Indonesia tamba sira aprende durante tinan 24 laran iha tempo Indonesia,” hateten Dosente Da Silva.
Constituisaun RDTL hatete katak lingua hat mak konsagra tiha ona; katak lian Tetun sai hanesan lingua ofisial e sai mos hanesan lingua Nasional, lian Portugues mos Lingua Ofisial, Lingua Ingles no Indonesia sai hanesan linguas de trabalho.
Entertantu Vise Prezidente Komisaun F, Parlamentu Nasional, ne’ebe toma konta asuntu konaba Educasaun, Saude no Kultura, Deputado Francisco Jeronimo hateten katak tuir sistema educasaun iha tinan 2012 Universidade mos tenki hanorin ona ho Portugues ba primeiru ano, Semester 1 no katak semestre sira seluk ne’ebe antigu kontinua nafatin ho lingua ne’ebe mak hanorin ona.
“Tamba durante ne’e ita nia estudante mai ona ho Portugues to’o iha Universidade tenki ho Portugues. Universitario ne’ebe sei hanorin ho lingua Indonesia no lian seluk diak liu Universidade lalika simu estudante, lalika hanorin, tamba nia labele halo baralha ba estudante nia kakutak,” hateten Vise Prezidente Komissaun F Jeronimo.
