“Ami iha servisu ho Policia VPU [Univdade Ema Vulneravel] nudar membru rede protesaun ba labarik ne’e duni se mak iha informasaun katak kompania ida ne’e fo servisu ho kategoria todan ba labarik ho idade minoridade 18 mai kraik fo hatene policia no policia atua kedas. No labarik ne’ebe vitima sai ami nia kliente ami foti kedas dadus liu husi dalan prosesu no policia lori kedas kazu ne’e ba iha Ministerio Publiku. Maske Kodigu Direitu Labarik ne’ebe seidauk promulga maibe bazeia ba artigu 18 no Konvensaun Direitu Labarik nian ne’ebe estado Timor–Leste ratifika katak violasaun krime bele tama iha tribunal,” hateten Directora Diresaun Nasional da Reinsersaun Sosial, Antonia Carmen da Cruz, foin lalais iha edifisio Ministerio Solidaridade Social (MSS), iha Bemori, Dili.
Diretora da Cruz hatutan katak Governu sempre halo kampanha no sosializasaun ba kompania sira katak la bele fo servisu ne’ebe todan ba labarik sira tanba ne’e viola Direitus Umanus.
“Ne’eduni se kompania ne’ebe kontinua fo servisu ne’ebe kategoria todan ba labarik governu sei foti medidas ruma tuir Konvesaun Direitu Labarik nian la presiza karta legal tanba governu servisu ho polisia VPU sira no harii ona rede protesaun iha distritu no sub-distritu,” hatutan tan Diretora da Cruz.
Nia mos apela ba autoridade lokal, komunidade no publiku tomak ne’ebe iha informasaun ruma konaba kompania ne’ebe fo servisu ba labarik ho idade minoridade sira atu bele hato’o keixa iha policia VPU sira atu nune’e keixa ne’e prosesa kedas no sei la hein.
Iha parte seluk Deputado Inacio Moreira, FRETILIN, iha Parlamentu Nasional, iha Dili, perkupa tebes ho kestaun ne’e tanba ne’e kontra direitus umanus labarik nian tuir lolos iha ona konvensaun direitu labarik nian ne’ebe ratifika ona tenke hakruk ba konvesaun ne’e.
“Ita ratifika ona Konvesaun Direitus Umanus ne’e universal Timor-Leste tenke adopta no tenke kumpri Konvesaun ida ne’e para labele ida-idak halo ninian no Estado tenke toma responsabilidade no buka alternativa oinsa atu fo protesaun diak ba joven ho idade minoridade sira ne’ebe tenke servisu buka osan hodi sustensa sira nia familia,” dehan Deputado Moreira.
Nia rekuinhese mos katak iha kompania lubuk ida iha rai laran lori labarik ho idade minoridade sira atu halo sira nia servisu ho ida ne’e nia apela ba Governu atu toma atensaun hela ba kestaun ne’e atu foti alternativa ida hodi bele rezolve problema ne’e tanba hahalok sira hanesan ne’e krime.
