Prezidente Repúblika (PR), José Ramos-Horta, husu traballadór Timor-oan sira atu hatudu disiplina, komportamentu di’ak no responsabilidade bainhira hala’o servisu iha rai-li’ur, liuliu iha Austrália.
“Komportamentu di’ak sei sai ezemplu ba ema seluk, no importante tebes atu traballadór sira aproveita oportunidade atu aprende língua Inglés atu bele aumenta sira-nia kapasidade profisionál bainhira fila fali mai Timor-Leste,” hateten Prezidente Ramos-Horta iha serimónia asinatura deklarasaun entre traballadór sira no governu molok sai ba Austrália, iha Otél Palm Springs, Fatuhada, Díli.
Nia afirma katak traballadór Timor-oan sira la’ós de’it buka moris di’ak iha rai-li’ur, maibé mós kontribui diretamente ba dezenvolvimentu ekonomia no hametin relasaun bilaterál entre Timor-Leste no Austrália.
Nia hatutan katak relasaun ekonomia entre nasaun rua ne’e interligadu no bainhira ekonomia Austrália buras maka’as, sei fó benefísiu ba Timor-Leste liuhusi oportunidade empregu no rendimentu ne’ebé traballadór migrante sira hetan.
Iha biban hanesan Prezidente Ramos Horta hato’o parabéns no deseja susesu ba traballadór sira hotu iha sira-nia servisu.
Iha parte seluk, Sekretáriu Estadu Formasaun Profisionál no Empregu (SEFOPE), Rogério Araújo Mendonça, hateten katak traballadór na’in 135 ne’ebé sei aranka iha tempu ne’e sei koloka iha empreza sanulu (10) iha Austrália.
“SEFOPE kontinua fó formasaun no motivasaun ba traballadór sira atu kumpre kontratu no prosedimentu ne’ebé estabelese ona entre Governu Timor-Leste ho nasaun parseiru sira,” nia dehan.
Rogério mós hateten katak programa mobilidade laborál sai hanesan medida preventiva atu garante traballadór sira ba liuhusi mekanizmu ofisiál, hodi asegura sira hetan protesaun legál tuir akordu bilaterál sira.
Nia haktuir mós katak programa mobilidade laborál ne’e hahú iha tinan 2012 no to’o agora sidadaun Timor-Leste hamutuk 25.366 mak hetan ona oportunidade servisu iha Austrália.
Entretantu, Adjuntu Embaixadór Austrália ba Timor-Leste, Edward Wilkinson, afirma katak traballadór sira sei distribui ba estadu oioin iha Austrália, hanesan Queensland, Austrália Súl, Tasmania, Nova Gales Súl, Vitória no Austrália Osidentál.
“Traballadór Timor-oan sira sei fó kontribuisaun importante ba setór industriál no komunidade iha Austrália, enkuantu hametin lasu ema-ba-ema ne’ebé sai baze ba relasaun bilaterál entre nasaun rua,” nia dehan.
Nia dehan katak Governu Austrália sei kontinua kompromete atu servisu hamutuk ho Governu Timor-Leste no parseiru sira seluk atu garante esperiénsia servisu ne’ebé seguru, pozitivu no sustentável ba traballadór sira, sira-nia família no dezenvolvimentu Timor-Leste iha tempu naruk.
