Ministériu Agrikultura, Pekuária, Peskas no Florestas (MAPPF) identifika ona fatin rua (2), iha Metinaro no Tibar, hodi instala portu peska atu fasilita peskadór sira atraka ró no hatún rezultadu peska ne’ebé sira hetan.
Ministru MAPPF, Marcos da Cruz, hateten katak dadaun ne’e peskadór sira fila husi peska atraka arbiru de’it, tanba seidauk iha portu própriu.
“Ita deside ona fatin rua (2), hanesan Metinaro no Tibar, hodi instala portu própriu ba peskadór sira hodi atraka no hatún ikan ne’ebé sira hetan,” Ministru MAPPF Cruz dehan iha Lecidere, Díli.
Nia hatete katak governu kontrata ona konsultór internasionál ida (1) atu prepara dezeñu no Bill of Quantities (BOQ) ba portu rua (2) ne’e, no instalasaun sei hahú depois finaliza dezeñu.
“Bainhira ita halo ida-ne’e, kuandu kompleta ona nia sei bele fasilita ita-nia peskadór sira, nune’e mós ita-nia kompañia sira ne’ebé kaer ikan iha ita-nia tasi,” nia salienta.
Aleinde ne’e, nia dehan katak portu refere mós atu responde ba kestaun ne’ebé Primeiru-Ministru temi kona-ba oinsá bele preserva no konserva produtu peska.
Nia informa katak Ministériu Justisa atribui ona rai ba instalasaun portu rua (2) ne’e, no sei iha mós termus referénsia atu hala’o estudu hodi kompleta nesesidade sira iha portu refere.
Iha parte seluk, peskadór Francisco Ximenes dehan katak durante hala’o atividade peska, difikuldade ne’ebé sira enfrenta mak falta fatin atu atraka ró. Tanba ne’e, sira atraka arbiru de’it, no dala ruma ikan ema na’ok ka polísia prende sira.
“Ami presiza duni portu própriu ida atu ami bele para ami-nia ró, nune’e bele tau mós ho seguransa hodi asegura sasan ka produtu hirak ne’ebé ami hetan husi peska,” nia hatete.
Nia hatete katak bainhira portu rua (2) ne’e preparadu ona, governu tenke kria regulamentu hodi regula peskadór hotu ne’ebé atraka iha ne’ebá, nune’e bele kuidadu infraestrutura bázika ne’ebé iha.Aleinde ne’e, nia dehan katak depois portu refere finaliza, governu sei estabelese ekipa ida husi Diresaun-Jerál Peskas, nune’e mós tékniku sira ne’ebé iha koñesimentu atu haree no halo jestaun ba ró hirak ne’ebé atraka iha ne’ebá.
