Stok ai-han iha armazén Autoridade Protesaun Sivíl (APC) dadaun ne’e preparadu ona hodi responde ba situasaun El Niño iha Timor-Leste.
Sekretáriu Estadu APC, Mariano Reis, hatete katak dadaun ne’e Timor-Leste sei hasoru impaktu husi El Niño, no governu prepara ona ai-han hodi responde bainhira bailoron naruk.
“Stok ai-han governu prepara ona iha armazén nasionál sira hodi apoiu komunidade bainhira hasoru El Niño no susar atu hetan ai-han,” nia hatete.
Nia hatete katak situasaun El Niño bele hamosu bailoron naruk, falta bee no ai-han no tanba ne’e, governu hahú antisipa ona, liuliu kona-ba stok iha armazén.
“Stok ne’ebé ita prepara iha armazén iha item rua (2), food no non-food,” nia dehan.
Nia informa katak armazén APC iha kada munisípiu asegura ona stok, no ai-han hirak ne’e hetan apoiu husi World Food Program (WFP) no parseiru sira seluk.
Aleinde stok ai-han, ekipa APC mós halo ona identifikasaun ba bee-matan sira ne’ebé sei maran no la maran, nune’e iha situasaun El Niño, APC bele oferese bee.
Iha parte seluk, Director Disaster Pacific Community Fiji, Litea Biukoto, dehan katak relasiona ho situasaun El Niño, governu Fiji prontu atu apoiu Governu Timor-Leste, liuliu kona-ba stok iha armazén.
“Ami apoiu armazén ida no kompletu ho ai-han sira hodi oferese ba komunidade sira ne’ebé presiza iha situasaun bailoron naruk,” nia informa.
Nia hatete katak armazén ne’e la’ós apoiu de’it ba situasaun El Niño, maibé mós ba vítima sira ne’ebé enfrenta dezastre naturál.
Nia hatete katak sasan sira ne’ebé Fiji oferese haree liu ba item food, nune’e mós nesesidade dapur nian.Aleinde ne’e, nia dehan katak sira nafatin komunika ho parseiru seluk, karik iha item ne’ebé governu Fiji labele responde, parseiru sira seluk bele oferese.
