Grupu Juventude Kreativu ba Futuru (JKF) dadaun ne’e kultiva ona bafo kay-rala hektar ida iha área Beskem, Suku Aiteas, Munisípiu Manatuto.
Sekretáriu Estadu Kooperativa (SEKoop), Arsénio Pereira da Silva, hateten katak produsaun bafo kay-rala iha Timor-Leste dadaun ne’e hatudu progresu di’ak, tanba maioria munisípiu sira kultiva ona maske ho kuantidade ki’ik.
“Dadaun ne’e grupu JKF kultiva tan hektar ida iha Munisípiu Manatuto. Ita haree progresu dezenvolvimentu ne’e di’ak tebes,” nia dehan.
Nia hatete katak iha área kultivasaun bafo kay-rala hatudu progresu ne’ebé positivu. Kultivasaun agríkola ne’e la’o hamutuk ho produtu seluk hanesan modo, lakeru, ai-manas, ai-dila, brinjela, fehuk no ai-han seluk, hodi aumenta diversidade produsaun no kontribui ba seguransa alimentár komunidade nian.
“Ita apresia tebes esforsu no dedikasaun husi membru JKF sira ne’ebé kontinua servisu maka’as atu dezenvolve setór agríkola iha área refere. Enkoraja grupu ne’e atu kontinua aumenta produsaun bafo kay-rala no aproveita oportunidade merkadu sira atu hasa’e rendimentu ekonomia membru no komunidade sira,” nia salienta.
Nia dehan katak produsaun lokál hanesan bafo kay-rala importante tebes atu suporta dezenvolvimentu ekonomia rurál no hamenus dependénsia ba importasaun ai-han.
Iha parte seluk, reprezentante Grupu Juventude Kreativu ba Futuru, Matias Lay, hateten katak dadaun ne’e sira kultiva bafo kay-rala iha hektar ida no produsaun hatudu rezultadu di’ak.
“Ba oin ami sei aumenta tan produsaun no servisu hamutuk ho SEKoop tuir akordu ne’ebé iha hodi reforsa setór agríkola,” nia dehan.
Nia hatete katak produsaun bafo kay-rala ne’e hatudu rezultadu di’ak, maibé presiza merkadu atu produtu hirak ne’e bele fa’an no lori rendimentu ba komunidade.
“Ami-nia hakarak produtu ne’ebé ami kuda tenke folin iha merkadu, tanba ami garantia katak ami kuda governu sosa,” nia informa.
Nia informa katak bafo kay-rala ne’ebé sira kultiva ne’e liuhusi orsamentu ne’ebé SEKoop apoia iha tinan 2025.
Aleinde ne’e, governu liuhusi SEKoop kontinua apoia no promove atividade kooperativa no agríkola sira hodi fortalese ekonomia lokál, kria oportunidade servisu ba juventude no hasa’e bem-estar komunidade sira iha rai laran.
