Autoridade Munisípiu Lautem dadaun ne’e utiliza ona sorghum ba merenda eskolár hodi estudante sira konsumu iha eskola.
Prezidente Autoridade Munisípiu Lautem Nelio de Jesus dehan, implementasaun programa merenda eskolár iha Munisipiu Lautem dadaun ne’e realiza husi grupu komunitaria sira tanba ne’e sorghum mós eziste iha menu merenda eskolár.
“Dadaun ne’e eskola sira iha Munisípiu Lautem utiliza sorghum ba merenda eskolár,” nia informa.
Nia dehan, sorghum ne’e produz husi ai Bafo-Kairala bele halo sai dosi nune’e mós tein sasoro hodi oferese ba estudante sira iha eskola.
“Sorghum ne’ebe ita utiliza ba merenda eskolár ne’e distribui husi MOKATL ita kopera mós ho Sekretariu Estadu Kooperstiva (SECOP) tanba Bafo-Kairala ne’e bele produs ba menu oi-oin,” PAM Lautem Jesus hatete.
Enkuantu nia dehan, iha Munisípiu Lautem rasik iha Bafo-Kairala maibé nia produsaun ladun barak. Tanba ne’e sira husu ba SECOP atu hasa’e tan nia produsaun.
“Atu nune’e sorghum labele lakon iha menu merenda eskolár liu-liu iha Lautem, nia saliente.
Entretanu Primeiru-Ministu Kayrala Xanana Gusmão dehan, iha munisípiu sira ne’ebé mak Bafo-Kairala iha favor tenke tau iha merenda eskolár.
“Munisípiu Lautem sai ezemplu ba munisípiu sira seluk, tanba sira konsegue utiliza ona sorghum ba menu merenda eskolár,” nia salienta.
Nia hatete, autoridade munisípal sira tenke koordena ho kooperativa sira ne’ebé produz Bafo-Kairala atu nune’e tau ba merenda eskolár tanba Bafo ne’e nutrisaun di’ak.
Iha fatin seluk Sekretáriu ba Sekretariadu Kooperativa (SECoop) Arsenio Pereira dehan, antes sira lansa ona utilizasaun sorghum ba merenda eskolár iha eskola Dona Ana-Lemos Gleno Munisípiu Ermera.
“Ita-nia prioridade atu promove produtu lokal sira iha merenda eskolár. Tanba ne’e sorghum ne’e ita distribui ona ba eskola lubuk ida hodi tau iha menu merenda eskolár,” nia informa.
Nia hatete, ba oin sira organiza komunidade agrikultór sira atu kontinua kuda Bafo-Kairala atu nune’e bele distribui ba eskola hotu iha territoriu laran nune’e bele utiliza ba merenda eskolár.Enkuantu nia dehan, menu ba merenda eskolár ne’e 75% ne’e mai husi produtu lokal tanba ne’e SECoop kontinua motiva agrikultor sira atu produs produtu lokal sira nune’e mós Bafo-Kairala.
