Durante fulan lima (5) hahú husi Janeiru to’o Maiu 2026, Autoridade Nasionál Marítima (ANM) identifika ona ró barak mak hala’o atividade peska ilegál iha tasi territoriál Timor-Leste nian.
“Husi satelite ne’e durante fulan 5 nia laran hahú husi Janeiru to’o Maiu tinan 2026 ita identifika ró hamutuk 50 mak hala’o atividade peska ilegál iha tasi teritorial Timor nian,” Prezidente ANM, Komodoro Higino das Neves hatete.
Komodoro Higino das Neves dehan, atividade peska ilegál ne’ebé sempre akontese iha tasi Timor-Leste nian ne’e, autoridade kontrolu deit husi satelite ne’ebé instala ona iha Komar ANM nian.
Nia hatete, ró ilegál 50 ne’e barak liu mak husi Indonesia, China, no Tailandia, maibé nia dehan ANM kontrolu de’it ho saletile no la halo intervensaun, tanba la iha ró boot.
“Pratikamente ita laiha ró boot atu halo operasaun di’ak liu iha tasi kosta-sul. Ami fó hanoin ona ba governu atu sosa ró atu oferese ba iha Unidade Navál [F-FDTL], hodi halo atividade operasaun,” Komodoro Neves hatete.
Nia dehan, ba peska ilegál ne’e Autoridade ANM, sei lansa ro boot rua (2) ida iha Betano no ida iha Suai Loro hodi kontrolu ba sirkulasaun ro ilegál iha tasi.
“Ha’u fiar katak bainhira lansa ró hirak ne’e ami sei servisu di’ak liu tan, atu bele kombate atividade ilísitu sira iha tasi laran,” nia esperansa.
Alende ne’e nia dehan, dadaun ne’e Unidade Polísia Martima (UPM-PNTL) no Komponente Naval Lizeira (F-FDTL) mak apoiu ba autoridade nasionál máritima (ANM) hodi halo patrollamentu.
Iha parte seluk, Diretór Ezekutivu Fundasaun Mahein (FM)Nelson Belo dehan, ezisténsia ANM ne’ebé kompostu husi UPM, forsa Naval, Alfándega, Aportil durante ne’e la iha funsionamentu.
“Ita haree de’it mak UPM ho naval seluk laharee sira-nia servisu, no razaun katak laiha ekipamentu,” nia hatete.
Nia hatete, se harii tiha Autoridade Nasionál Marítima ne’ebé kompostu husi ministériu relevante sira, maibé sira-nia prezensa laiha, nusa la kria ekipa servisu konjunta husi UPM no Naval de’it.Alende ne’e nia dehan, governu bainhira atu kria autoridade ida tenke prepara uluk kondisaun, fasilidade, ekipamentu, atu nune’e ema hirak ne’ebé koloka ba iha autoridade ne’e idak-idak bele halo servisu tuir nia knaar, la’ós balun servisu balun nonton de’it.
