Academia Becora Sub-15 hala’o preparasaun intensivu ba jogadór na’in 18 atu partisipa iha Jogu Futeból U-15 (JS) Ji Sung Cup iha Korea, ne’ebé sei realiza iha loron 18 to’o 28 fulan Jullu tinan 2026. Kompetisaun internasionál ne’e importante ba dezenvolvimentu futeból joven iha Timor-Leste (TL).
Asistente treinadór Academia Becora, Denilson Guterres, hatete katak preparasaun ba torneiu refere hahú kedas husi fulan Janeiru, liuhusi prosesu selesaun rigorozu ne’ebé envolve jogadór na’in 40 husi área oioin. Husi prosesu ida-ne’e, ekipa tékniku konsegue hili sira-na’in 18 mak atu reprezenta Timor-Leste iha Cup refere iha nasaun Korea.
“Iha tinan ida-ne’e ami prepara tim ida ho sériu atu ba kompete iha Korea. Preparasaun ne’e importante tebes atu hasa’e kapasidade jogadór sira, liuliu bainhira hasoru ekipa sira husi nasaun ne’ebé iha nivel futeból aas liu,” dehan Denilson iha fatin treinu Becora, Díli.
Denilson esplika katak, preparasaun ne’e la’o ho etapa oioin, inklui treinamentu fiziku atu hasa’e rezisténsia no forsa, treinamentu tékniku atu melhora abilidade kontrola bola no organizasaun atake, no mós treinamentu tátika atu asegura jogadór sira komprende estratéjia iha kampu.
Nia akresenta tan katak durante kompetisaun ne’ebé dura semana rua nia laran, jogadór sira sei hasoru ekipa husi nasaun oioin hanesan Thailandia, China, Japaun no Austrália. Tuir planu, ekipa Academia Becora sei aranka ba Korea iha loron 15 fulan Jullu atu adapta an ho ambiente no halo preparasaun ikus molok hahú kompetisaun ofisiál.
Entretantu, reprezentante ekipa, Marco Evander Leito Moniz Guterres, hatete katak durante fulan ne’e, sira hala’o treinamentu intensivu ne’ebé fokus ba aspetu tékniku no fiziku.
“Durante preparasaun ne’e ami treinu makaas kona-ba oinsá atu harii atake husi liña kotuk, kontrola bola ho di’ak no hasa’e forsa fizika. Ida-ne’e importante tebes atu ami prontu bainhira kompete iha rai liur,” dehan Marco.
Nia afirma kada loron sesta, jogadór sira halo joga try out hasoru malu atu fortalese koordenasaun ekipa no hadia tomada desizaun iha situasaun real kampu nian.
“Treinu mentalidade importante tebes, tanba bainhira ami joga iha rai-liur, ami tenke bele kontrola emosional, la bele pániku no fó resposta lalais ba situasaun iha kampu,” nia hatutan.Nia esplika preparasaun ne’ebé lao hela durante ne’e hatudu komitmentu ekipa nian atu dezenvolve talentu joven sira no fó oportunidade ba sira atu hetan esperiénsia iha nivel internasionál. Ho esperiénsia ida-ne’e, jogadór sira bele aumenta sira-nia kapasidade no kontribui ba dezenvolvimentu futeból nasionál iha futuru.
