Militár ne’ebé envolve iha asaun krime no bainhira submete ba prosesu no identifika sai autór, komandu Falintil Forsa Defesa Timor-Leste (F-FDTL) tenke demite husi servisu.
Xefe Estadu Maior Jeneral F-FDTL Tenente Jeneral Domingos Raul Falur Rate-Laek dehan, Komandu F-FDTL la tolera membru sira ne’ebé envolve iha krime, se membru ne’ebé mak envolve, nia mós prontu atu hetan sansaun.
“Liga ba kazu omesidu ne’ebé akontese iha Aldeia Poros Suku Mehara, Postu-Administrativu Tutuala, Munisípiu Lautem, ne’e komandu simu ona informasaun. Maibé, bainhira relatoriu kompletu mai ita sei submete ba prosesu justisa, mak identifika duni katak militar refere mak komete tenke demite no fila ba sivil hodi kontinua ba kadeia,” nia hatete.
Nia hatete, iha ema ida ka rua de’it iha instituisaun ne’e mak la di’ak la’os ema hotu, sira ne’ebé ladi’ak komete aktu kriminozu tenke hasai.
“Prosesu primeiru ita sei halo uluk ba membru ne’e nia Komandante hodi hatene husi Komponente ne’ebé, nune’e identifika tiha mak kontinua ba tribunal,” Tenente Jeneral Falur hatete.
Enkuantu nia dehan durante ne’e komandu hasai ona membru lubuk ida, tanba komete krime no kontra lei disiplinar F-FDTL nian, nune’e mós abandona feen no oan.
Iha parte seluk Deputada Angelica Sarmento dehan, kazu membru F-FDTL hasoru sidadaun ne’e la’os foin akontese, maibe bei-beik ona, aktu ne’ebé membru sira komete ne’e, tanba ransu hodi konsumu alkohol la’os instituisaun F-FDTL mak haruka.
“Bainhira membru ida kuandu halo aktu krime hodi halakon ema seluk nia vida komandu iha kompeténsia tomak hodi submete ba prosesu iha tribunal nune’e hasai husi milítar,” nia hatete.
Nia dehan, nune’e bele sai lisaun ida ba membru sira seluk karik sai ba liur ka iha komunidade nia leet, sira atu halo aktu hanesan ne’e sira mós tauk, bainhira aplika sansaun la rigorozu mak kazu hanesan sei kontinua akontese husi membru sira seluk.
“Husu mós atu komandu fó formasaun karakter ba membru sira atu bele eduka sira-nia an bainhira iha komunidade nia let ka iha atuasaun ba konflitu sira,” Deputada Sarmento hatete.Alende ne’e mós husu ba membru F-FDTL, labele sai inimigu ba povu, maibé sai seguransa hodi proteje sira iha kualker tempu bainhira presiza.
