Haris fatin públiku iha merkadu nasionál Manleuana, iha kapital Dili, dadaun ne’e kondisaun ladi’ak no la ijiene ba negosiante no vizitante sira hodi utiliza bainhira presiza hodi soe foer boot no ki’ik.
Negosiante Eduardo Cabral dehan, negosiante sira iha merkadu Manleuana enfrenta problema haris-fatin, tanba dadaun ne’e kondisaun ladi’ak, tanba intupidu hodi halo foer no iis.
“Ita bele dehan katak haris-fatin iha merkadu nasionál Manleuana dadaun ne’e la ijiene no fó impaktu negosiante no vizitante sira-nia saúde,” nia dehan.
Nia hatete, bainhira sente atu ba sintina to’o iha ne’ebá haree haris-fatin ne’ebé mak intupidu no nakonu ho foer depois iis no halo vontade atu soe foer mós laiha.
“Ho kondisaun haris-fatin ne’ebé la di’ak ami la fó sala governu, tanba ida-ne’e sala husi ema hirak ne’ebé mak utiliza la ho kuidadu, tanba balun soe fali lenxu, tixu no fatuk ba laran hodi halo intupidu sintina, ikus mai sai aat,” nia hatete.
Nia hatete, liga ba kondisaun ne’ebé iha susar tebes ba sira bainhira sente atu ba sintina dalaruma sira hein to’o fila uma mak soe foer boot. Tanba ne’e husu governu karik bele halo manutensaun ba haris-fatin públiku ne’e hodi fasilita negosiante no vizitante sira bainhira presiza.
Iha fatin hanesan, vizitante Marta Varela dehan, iha merkadu Manleuana ne’e la’ós sintina de’it mak la ijiene, maibé fatin sira ne’ebé ema faan ropa ne’e sudut-sudut sira-ne’e mesak iss mii dois de’it, tanba dalabarak negosiante sira la utiliza sintina, maibé mii de’it iha fatin faan ropa ne’e.
“Liu-liu iha fatin sukat ropa (kamar paz) ne’e ita tama ba mesak iis mii dois de’it,” nia hatete.
Entretantu Diretór Serviço Municípal Gestão Mercado e Turismo iha Autoridade Município Díli Artur Henrique dehan, Jestaun Merkadu Turismu estabele ona bee moos no haris-fatin kompletu, maibé negosiante sira la iha konsiénsia hodi utiliza.
“Ita haree sira laiha konsiénsia hodi utiliza ho kuidadu nune’e haris-fatin bele mós no ijiene nafatin, tanba iha merkadu Manleuana ne’e bee moos laiha problema,” nia dehan.
Nia hatete, governu prepara ona fasilidade hotu, maibé sira mak lakuidadu ikus dehan governu mak la tau atensaun.Enkuantu iha merkadu nasionál Manleuana haris fatin públiku ne’ebé governu prepara hamutuk 4 kompleta ho bee moos.
