Komunidade ne’ebé hala’o atividade peska husi Suku Nunira, Postu-Administrativu Laga, Munisípiu Baucau, António Cabral, hateten katak hakiak ikan iha viveiru ajuda tebes peskadór sira, tanba la presiza ba tasi beibeik no bele kontrola produsaun ho di’ak liu.
“Hakiak ikan iha viveiru ajuda tanba la presiza ba tasi beibeik. Bainhira ami kaer ikan iha tasi, difísil atu rai tanba laiha freezer, maibé iha viveiru, bainhira atu fa’an mak foin kaer,” hateten António husi komunidade Nunira.
Nia espera katak ho kontribuisaun entre akuakultura, distribuisaun ekipamentu peska no investimentu husi setór privadu, setór peska bele sai motor importante ida ba dezenvolvimentu ekonomia nasionál, liuliu iha área kosteira sira.
“Inisiativa sira-ne’e mós hanesan parte husi estratéjia boot atu promove peskadór sira no garante utilizasaun rekursu tasi ho forma sustentável, hodi fó benefísiu ba jerasaun agora no futuru,” nia afirma.
Ministru Agrikultura, Pekuária, Peskas no Florestas (MAPPF), Marcos da Cruz, hateten katak governu fó atensaun boot ba setór peska hanesan pilar importante ida iha programa ekonomia azul, ne’ebé fó oportunidade atu aproveita rekursu tasi ho forma sustentável.
“Agora dadaun ita foku mós ba akuakultura, hakiak ikan iha viveiru, ne’ebé agrikultór barak komesa hatudu interese,” dehan Ministru Marcos iha Salaun MAPPF, Comoro, Díli.
Nia esplika katak atu hasa’e produsaun ikan, governu foka ba dezenvolvimentu akuakultura liuhusi estabelesimentu viveiru ikan iha área oioin.
Nia dehan katak governu mós distribui ró peska kiik ba peskadór sira atu fasilita atividade peska no hasa’e produtividade. Nia considera medida refere importante tebes atu ajuda komunidade sira ne’ebé depende diretamente ba tasi hodi sustenta sira-nia moris loroloron.
Nia afirma katak governu la’ós fó oportunidade de’it ba komunidade, maibé mós loke dalan ba investimentu husi setór privadu, no katak veteranu no emprezáriu nasionál balun simu ona lisensa atu kaer ikan iha tasi Timor-Leste
“Ita fó oportunidade ba emprezáriu nasionál sira atu investe iha peska. Agora ita halo ona lansamentu ró peska rua (2) ne’ebé veteranu sira investe,” Ministru da Cruz dehan.
