Komunidade husi Aldeia Aisahé, Suku Bahalarauin, Postu-Administrativu Viqueque, Munisípiu Viqueque, iha ona solusaun ba problema asesu bee ne’ebé enfrenta durante tinan barak, liuhusi projetu bee moos ne’ebé Adventist Development and Relief Agency (ADRA) implementa iha área refere.
Reprezentante komunidade, Julião Pinto, hateten katak antes ne’e komunidade depende de’it ba bee mota hodi konsumu loroloron no atividade doméstika sira seluk no katak situasaun ne’e lori difikuldade boot, liuliu bainhira tempu udan, bee mota sae boot no perigu ba komunidade atu ba kuru.
“Durante tempu udan, ami la bele ba kuru tanba mota sae boot. Dala ruma ami tenke la’o dook no sae foho atu buka bee moos, ne’ebé lori tempu naruk,” dehan komunidade Pinto iha nia rezidénsia, Suku Bahalarauin, Viqueque.
Nia hatutan katak ho implementasaun projetu bee moos ADRA nian, agora komunidade la presiza ona halo esforsu hanesan antes.
“Ami sente kontente tebes, tanba bee moos tama ona mai ami-nia aldeia. Ida-ne’e ajuda loos ami-nia moris loroloron no bele hadia ami-nia saúde,” nia akresenta.
Iha parte seluk, Reprezentante Xefe Suku Bahalarauin, Helio Lobato Pinto, subliña importánsia manutensaun no kuidadu ba fasilidade bee moos no husu komunidade atu iha responsabilidade hamutuk hodi proteje infraestrutura ne’ebé fó benefísiu ba ema hotu.
“Ita hotu tenke kuidadu bee ne’e ho di’ak. Se ita la kuidadu, fasilidade ne’e bele estraga iha tempu badak, depois ita sei enfrenta fali difikuldade hanesan uluk no presiza husu ajuda fali,” dehan Xefe Suku Pinto.
Nia mós husu komunidade atu halo konsiénsia koletiva, labele uza bee ne’e sem limite, maibé presiza halo jestaun di’ak atu garante sustentabilidade iha futuru.
Iha parte seluk, Responsável ADRA Timor-Leste, Gaspar da Silva, hateten katak organizasaun nia prezensa iha Munisípiu Viqueque atu servisu hamutuk ho autoridade lokál sira, inklui xefe suku no líder komunitáriu, hodi fó apoiu ba komunidade sira ne’ebé seidauk asesu ba bee moos.
“Objetivu prinsipál husi ADRA mak atu asegura komunidade hotu iha direitu atu asesu ba bee moos no seguru. Ami servisu hamutuk ho autoridade lokál atu identifika nesesidade komunidade no implementa solusaun ne’ebé apropriadu,” dehan Gaspar.Nia mós hateten katak projetu bee moos la’ós de’it fó asesu ba bee, maibé mós kontribui ba prevensaun moras, hanesan diareia no infesaun seluk ne’ebé normalmente mosu tanba utilizasaun bee la moos.
