Implementasaun polítika zero toleránsia violénsia iha eskola sira la’o ho susesu, tanba ajuda hamenus violénsia entre profesór no estudante sira iha eskola.
Koordenadór Eskola Báziku Filiál (EBF) Fatumeta, iha Kapital Díli, Manuel Pires, hateten katak antes ne’e inan-aman sira sempre kestiona kona-ba profesór sira ne’ebé halo asaun fízika hodi baku estudante sira iha eskola, maibé depois implementasaun polítika zero toleránsia laiha ona violénsia iha eskola sira.
“Ita bele dehan katak implementasaun zero toleránsia susesu tebes iha eskola,” nia dehan.
Nia dehan katak implementasaun polítika refere atu hapara violénsia iha eskola entre profesór no estudante sira, nune’e mós entre estudante ho estudante.
“Maské dala barak profesór sira protesta kona-ba karakter estudante sira iha prosesu aprendizajen, maibé ho polítika zero toleránsia ne’e profesór sira labele baku estudante,” nia informa.
Nia hatete katak karik estudante sira halo sala, profesór bele fó kastigu maibé labele baku no katak bainhira profesór ida kontra polítika ne’e, sei hetan sansaun.
Iha parte seluk, Diretór Eskola Báziku Sentrál (EBC) Manleuana, iha Dili, Carlos Correia, dehan katak maské polítika zero toleránsia sai dezafiu ba profesór sira tanba estudante ida-idak iha karakter diferente, profesór sira tenke nafatin kumpre polítika ne’e.
“Maské ita-nia estudante sira iha karakter ne’ebé diferente tebes, maibé ita-nia profesór sira nafatin hanorin ho pasiénsia, fuan-boot, no tenke hakruuk ba implementasaun polítika zero toleránsia,” nia hatete.
Nia hatete katak iha prosesu aprendizajen, profesór sira labele baku estudante tanba asaun ida-ne’e konsidera violénsia.
Nune’e mós Koordenadór Eskola Báziku Filiál (EBF) N.º 5 Comoro, iha Díli, Marcelino Moniz, dehan katak iha sira-nia eskola maioria estudante sira iha idade ki’ik, no bainhira sira halo sala profesór sira fó kastigu, maibé la’ós baku.
“Kastigu ne’ebé eskola fó mak halo limpeza resintu eskola nian, haris-fatin, fó traballu,” nia hatete.
Nia informa katak durante ne’e seidauk akontese violénsia iha eskola refere, tanba profesór sira hanorin estudante ho maneira ne’ebé apropriadu.Enkuantu, implementasaun polítika zero toleránsia hahú iha tinan 2013 hodi evita violénsia hasoru labarik sira iha eskola nune’e mós iha sosiedade.
