EMBAIXADA SINGAPURA IHA DILI – KOMUNIDADU IMPRENSA
Kursu Lian Inglés Báziku no Kapasidade Komunikasaun, ne’ebé hetan apoiu husi Singapura liuhusi Inisiativa ba Integrasaun ASEAN (IAI), remata ho susesu. Kursu ne’e hala’o husi loron 5 to’o 23 fulan-Outubru tinan 2026, no hamutuk partisipante na’in-30 husi ministériu oioin iha Timor-Leste.
Kursu ne’e nia objetivu mak atu hametin koñesimentu báziku partisipante sira nian kona-ba lian Inglés no kapasidade komunikasaun prátika, hodi hasa’e sira-nia konfiansa atu komunica ho efetivu iha ambiente profisionál no iha moris loroloron. Liuhusi aula interativa no ezersísiu prátiku, partisipante sira hetan oportunidade atu dezenvolve kapasidade ko’alia, rona no komunikasaun interpesoál.
Embaixadóra Teo Lay Cheng hato’o parabéns ba partisipante sira tanba kompleta ho susesu programa ne’e. Nia enfatiza importánsia lian Inglés nu’udar lian servisu ASEAN, no hateten katak profisiénsia iha lian Inglés sei ajuda funsionáriu Timoroan sira atu komunica ho efetivu liután.
Embaixadóra Teo mós enkoraja partisipante sira atu kontinua pratika lian Inglés maski kursu remata ona. Nia dehan: “Konfiansa mai husi pratika, no halo sala mak parte naturál ida husi prosesu aprendizajen.” Nia aumenta tan: “Ha’u hein katak partisipante sira sei uza ho di’ak kapasidade foun ne’ebé sira hetan iha sira-nia fatin servisu no iha interasaun ho sira-nia kolega sira husi nasaun membru ASEAN seluk.”
Partisipante sira mós fahe sira-nia hanoin pozitivu kona-ba esperiénsia aprendizajen ne’e
“Ha’u aprende oinsá atu hakerek email profisionál no komunica ho klaru iha lian Inglés. Kursu ne’e ajuda hasa’e ha’u-nia konfiansa atu komunica ho parseiru internasionál no kliente sira. Ha’u sei uza kapasidade hirak ne’e iha ha’u-nia servisu iha INSS (Instituto Nacional Seguransa Sosiál) atu esplika di’ak liután kona-ba servisu seguransa sosiál.” Sr Zeferino da Costa Bobo, National Institute of Social Security (INSS)
“Kursu ne’e iha relevánsia boot ba responsabilidade profisionál ami nian, tanba hadi’a ami-nia kapasidade komunikasaun iha lian Inglés, liuliu iha ko’alia, hakerek no partisipasaun iha reuniaun sira. Kapasidade hirak ne’e sei ajuda ami atu troka ideia no komunica ho efetivu liután bainhira kolabora ho kolega sira husi nasaun membru ASEAN seluk”. Sr Eliseo Pedro A. S. Borges, Ministry of Economic Affairs and Tourism and Environment
Koñesimentu ne’ebé ami hetan sei mós hasa’e ami-nia konfiansa no profisionalizmu iha envolvimentu rejionál iha futuru, no hametin kooperasaun entre Estadu Membru ASEAN sira.”
Enkuantu Timor-Leste kontinua aprofunda nia envolvimentu ho ASEAN, profisiénsia iha lian Inglés sei sai importante liután atu permite funsionáriu sira partisipa ho signifikadu iha diskusaun no kooperasaun rejionál. Kursu dahuluk ne’e reflete kompromisu kontinua husi Singapura atu apoia dezenvolvimentu rekursu umanu no esforsu hametin kapasidade iha Timor-Leste.
Hahú iha tinan 2000, IAI (Initiative for ASEAN Integration) nia objetivu mak atu hamenus diferensa dezenvolvimentu entre Estadu Membru ASEAN sira no hametin integrasaun rejionál. Inisiativa ida-ne’e fó apoiu ba membru ASEAN sira ne’ebé seidauk dezenvolve di’ak liu husi asisténsia téknika, treinamentu no programa habelar kapasidade (capacity-building), atu nune’e sira bele partisipa ho efetividade boot liu iha atividade no prosesu ASEAN nian.
