Sekretáriu Estadu Kooperativa (SEKoop) husu estudante Universidade Nasionál Timor Lorosa’e (UNTL) atu halo peskiza kona-ba setór kooperativa, nune’e bele kontribui ba dezenvolvimentu ekonomia iha rai-laran.
Sekretáriu Estadu SEKoop, Arsénio Pereira da Silva, hatete katak dadaun ne’e presiza tebes peskiza kle’an kona-ba dezafiu no oportunidade sira ne’ebé iha impaktu ba ekonomia rai-laran.
“Estudante UNTL sira presiza halo peskiza ne’ebé kle’an kona-ba setór kooperativa hodi identifika dezafiu sira ne’ebé iha impaktu ba dezenvolvimentu ekonomia,” nia informa.
Nia hatete katak rezultadu peskiza ne’ebé estudante sira halo bele ajuda implementasaun servisu governu no kontribui ba dezenvolvimentu ekonomia iha Timor-Leste.
“Universidade iha papél importante atu suporta dezenvolvimentu kooperativa liuhusi peskiza, formasaun, inovasaun, estudu merkadu no rekomendasaun ba polítika públika,” SEKoop Silva dehan iha UNTL.
Nia hateten katak setór kooperativa sai hanesan pilar ida ba ekonomia nasaun, tuir Konstituisaun RDTL, hamutuk ho setór públiku no setór privadu.
Nia haktuir katak estudante sira tenke haree kooperativa la’ós de’it hanesan fatin atu buka servisu, maibé nu’udar oportunidade atu kria negósiu no atividade ekonomia ne’ebé bele fó benefísiu ba komunidade.
“Estudante sira la bele hatur an hanesan estudante de’it, maibé tenke sai mós hanesan peskizadór no kontribui ba saida mak nasaun presiza,” nia informa.
Aleinde ne’e, nia dehan katak la’ós de’it estudante sira, maibé profesór sira mós tenke orienta estudante sira hodi halo peskiza ba setór kooperativa hodi tulun governu buka solusaun ba problema sira.
Entretantu, estudante Felicia de Souza husi Departamentu Siénsia Ekonomia, Fakuldade Ekonomia Jestaun, hatete katak peskiza mós hola parte iha papél estudante sira-nian, tantu iha setór kooperativa no setór seluk.
“Ami orgullu tebes tanba governu presiza estudante nia kontribuisaun, liuliu iha parte peskiza nian. Ho ida-ne’e enkoraja ami estudante sira atu estuda no buka hatene kona-ba lakuna sira ne’ebé sai problema ba dezenvolvimentu ekonomia,” nia dehan.Nia dehan katak dezenvolvimentu iha setór hotu nia baze mak setór ekonomia, tanba ne’e presiza rezolve uluk setór refere no ba setór seluk sei fasil liu atu rezolve.
