Sekretáriu ba Sekretariadu Estadu Expedito Loro Dias Ximenes hateten, estabelesimentu rádio komunidade iha Balibó mak parte husi programa SECOMS atu promove asesu livre ba informasaun, reforsa transparénsia governu, no estimula partisipasaun sivíl iha dezenvolvimentu nasionál.
“Rádiu komunidade la’ós de’it meiu fó informasaun, maibé mós plataforma ida ne’ebé fó oportunidade ba komunidade atu partilla problema, ideia, no esperiénsia, hodi ajuda governu ba dezenvolvimentu sira ne’ebé bazeia ba nesesidade real komunidade. Tanba ne’e rádiu komunidade labele sai instrumentu propaganda, maibé tenke fó prioridade ba komunidade nia interese no atinje povu nia liafuan no realidade,” dehan SECOMS hafoin remata halo inaugurasaun ba Radio Komunidade Fronteira Balibo 5, iha Balibo.
Nia akresenta mós katak, rádiu komunidade iha Balibó sei fó kontribuisaun relevante ba edukasaun sidadania, promosaun saúde, agrikultura sustentável, no prevensaun dezastre natural.
“Komunikasaun efikáz sei ajuda povu atu prepara-an, aprende, no adapta ba mudansa tempu, ekonomia no sosiedade,” nia aumenta tan.
Nia dehan área fronteira presiza duni meiu komunikasaun ida ne’ebé aproxima povu ho governu.
Entretantu Autoridade Postu-Administrativu Balibo, Casamiro dos Santos, hateten katak projetu rádiu komunidade ne’e sei aumenta konesaun entre estrutura administrativu no povu lokal.
“Rádio komunidade mak lian komunidade, tanba média atu ema hatene programa governu no isu sira ne’ebé afeta moris loroloron, tanba ne’e ami sei uza rádiu ne’e ho forma ida ne’ebé edukativu no sosial, la’ós polítiku. Sei fó prioridade ba komunidade nia interese,” nia hateten
Nia hatudu, kontente tanba agora iha meiu ida ne’ebé bele uza atu hato’o mensajen, partilla informasaun edukativu, no diskuti problema sira iha aldeia.
“Komunidade nia esperansa agora sai realidade, agradese ba Governu liuhusi SEKOMS, tanba rona ona halerik durante ne’e. Proposta ida ne’e finalmente realiza, rádiu komunidade sai realidade iha ami-nia leet,” nia hateten.
Nia afirma tan katak, Balibo mak fatin iha luta independénsia Timor-Leste, komunidade lokal mós hatene valór simbóliku projetu ida-ne’e. Rádio komunidade sei sai espasu memóriál atu halibur povu iha esperansa no unidade.Nia akresenta, projetu Rádio Komunidade Fronteira Balibo ne’e implementa iha kolaborasaun entre SECOMS ho komunidade lokal, no sei kontinua iha parsería ho instituisaun relevante sira atu garante kontinuidade no sustenta operasaun rádio ne’e iha futuru.
