Ministériu Edukasaun (ME) dadaun ne’e re-ativa implementasaun Programa Saúde Eskolár iha eskola sira, depois paradu tanba laiha ekipamentu.
Diretór Jerál Ensinu Sekundáriu Jerál no Tékniku Vokasionál Deolindo da Cruz dehan, saúde eskolár ne’e importante tebes atu eduka estudante sira moris ho saudável no halo prevensaun ba sira-nia aan husi moras infesaun sira hanesan dengue, diarea, ISPA no seluk tan.
“ME dadaun ne’e re-ativa fali implementasaun saúde eskolár no kompleta ekipamentu sira hodi realiza implementasaun ne’e ho di’ak tuir objetivune’ebé iha,” nia hatete.
Nia hatete objetivu husi implementasaun mak estudante hotu tenke iha saúde ne’ebé saudável no livre husi moras infesaun sira nune’e bele partisipa iha prosesu aprendizajen ho di’ak.
“Saúde mak sai fatór importante iha prosesu aprendizajen, tanba estudante sira tenke iha kondisaun di’ak mak bele aprende ho efetivu,” nia informa.
Nia dehan, ekipamentu ne’ebé mak prepara ona hodi reforsa implementasaun ne’e mak hanesan tuir mai ne’e sabaun, rinso, toalla kiik, balde, hand sanitaijer, no prepara bee moos no seluk tan.
Entretantu Diretór Nasionál Edukasaun no Promosaun Saúde Jaime dos Reis Belo dehan, programa ne’e atu fahe informasaun saúde ba estudante sira oinsá atu halo prevensaun no prátika moris saúdavel.
“Ita presiza fahe informasaun ba labarik sira kona-ba saúde oral, eduka labarik sira oinsá prevene sira-nia nehan, fase liman no prevene dengue,” nia hateten.
Nia hatutan, eskola sai tarjetu ne’ebé pozitivu tebes, tanba labarik sira iha influénsia ne’ebé boot tebes iha família laran.
Iha parte seluk, Diretór Ensinu Báziku Sentral Fatumeta Cornelio Siquera dos Santos hatete, iha tinan 2016 iha sira-nia eskola programa saúde eskolar la’o maibé lakleur de’it para tiha.
“Uluk ami la’o hamutuk ho ekipa saúde sira halo promosaun saúde iha eskola kona-ba saúde oral ho nia prevensaun, fase liman no imunizasaun. Ita espera katak iha implementasaun ida ne’e bele la’o di’ak hodi salva estudante sira husi moras no oinsá eduka sira moris iha ambiente ne’ebésaudavel,” nia dehan.Nia hatutan, presiza mós fó formasaun ba profesór kona-ba edukasaun saúde hodi eduka estudante sira iha eskola, tanba eskola mak sai fatin atu estudante sira aprende ho di’ak.
