Ministériu Saúde (MS) kontinua reforsa importánsia programa vasinasaun ba labarik sira hodi prevene moras grave inklui kankru serviks, liuhusi servisu imunizasaun nasional ne’ebé implementa iha sentru saúde no eskola sira iha territóriu nasional tomak.
Médika Ofisiál Programa Departamentu Imunizasaun iha Ministériu Saúde, Doutora Angelina da Costa Rangel Barreto, hatete ministério kontinua halo esforsu atu asegura labarik sira iha Timor-Leste simu vasina kompletu tuir programa imunizasaun nasional.
“Programa ida-ne’e konsidera importante, tanba bele fó protesaun sedu ba labarik sira hasoru moras ne’ebé bele ameasa vida iha futuru, liuliu ba labarik feto sira ne’ebé presiza hetan vasina Human Papillomavirus (HPV) atu prevene kankru serviks,” hateten Dr. Angelina, iha eskola Maria Auxiliadora Comoro, Díli.
Nia hateten ba labarik feto sira ho idade tinan 11, MS fornese vasina HPV atu prevene virus HPV ne’ebé bele hamosu kankru serviks bainhira sira boot ona.
Dr. Angelina hatete katak kankru serviks moras ne’ebé hamate feto barak iha mundu tomak, inklui iha Timor-Leste, tanba ne’e prevene liuhusi vasinasaun konsidera importante, atu iha imunidade forte antes tama iha idade reprodutiva.
“Governu hakarak prepara sira husi agora atu iha imunidade forte. Ida-ne’e importante atu proteje saúde feto sira iha futuru no hamenus risku moras kankru serviks iha Timor-Leste,” hatete nia.
Dr. Angelina husu ba inan-aman sira atu la dúvida ka tauk hasoru programa vasinasaun ne’e tanba prosesu hotu hala’o tuir prosedimentu saúde ne’ebé seguru no kontroladu husi pesoál médiku sira.
Nia afirma katak vasina sira ne’ebé utiliza iha Timor-Leste, tanba liu tiha ona prosesu kontrolu no rekomendasaun husi organizasaun saúde kompetente sira, nune’e inan-aman la presiza preokupa kona-ba seguransa vasina.
Iha parte seluk, reprezentante inan-aman sira, Maria Soares, fó apresiasaun ba programa vasinasaun ne’ebé implementa husi MS, tanba konsidera importante atu proteje saúde oan sira husi moras sira iha futuru.
Nia hatete katak nia oan ne’ebé agora estuda iha sestu ano simu ona vasina HPV hafoin hetan esplikasaun husi doutór no pesoál saúde sira kona-ba benefísiu vasina ida-ne’e.“Tuir esplikasaun husi doutór sira, vasina ida-ne’e atu prevene kankru serviks. Hanesan inan, ha’u apoiu programa ida-ne’e, tanba di’ak ba saúde oan sira iha futuru,” dehan nia.
