Falesimentu Saudozu no eis-Prezidente Repúblika Timor-Leste períodu 2012-2016 nu’udar mós atual Prezidente Partídu FRETILIN, Francisco Guterres Lu-OLo la’ós lori triste de’it ba família, maibé ba povu no nasaun tomak.
“Família simu saudozu nia kadaver tun iha areoportu to’o rezidensia ne’e komunidade mós simu tuir dalan ho matan-ween. Ida ne’e hatudu povu Timor-Leste lakon aman, maun, lideransa, no saudozu ne’ebé kontribuisaun bo’ot ba luta ukun rasik an,” hatete Domingos Guterres nu’udar alin husi saudozu.
Nia agradese ba solidaridade husi sosiedade no povu nune’e mós parte governu no partidu nian ne’ebé hodi simu saudozu Lú-Olo nia isin-mate.
“Saudozu sai husi uma Farol ba trata nia saúde iha Ospitál Nasionál Guido Valadares nune’e Doutor sira haruka hodi kontinua halo tratamentu iha Malázia. Saudozu Francisco Guterres Lú-Olo hakotu iis iha ospitál Prince Court Malázia iha Malázia,” nia salienta.
Entretantu, Judite Ximenes hanesan komunidade, hatete, ho Saudozu Lú-Olo nia falesimentu ne’e sai ona lisaun ida ba lider rejisténsia sira atu moris ho dame no paz fó liman ba malu hodi valoriza malu.
“La’ós hein to’o mate mak foin ba vitiza malu lori lilin no aifunan ba,” nia dehan.
Nia hatete, falesidu Saudozu Lú-Olo ne’e povu hotu triste, tanba sente lakon tebes eroi no aman fundadór nune’e mós luta ba dezenvolvimentu Timor-Leste nian, la’os povu de’it mak triste, maibé fiar katak lider rejisténsia sira seluk mós triste, tanba lakon maun no alin ne’ebé uluk sira kaer liman hamutuk hodi halo funu hasoru inimigu sira.
Iha parte seluk Eis Tenente Jeneral Reformadu Lere Anan Timur hatete triste tanba Timor-Leste lakon ema diak ida.“Uluk ami luta hamutuk iha ai laran ho kompromisiu ida katak mate ka moris hamutuk hodi lori rai ne’e ba hetan ukun rasik aan, maibé nia husik mundu ne’e sedu liu. Ha’u sente katak nia husik mundu ida-ne’e sedu liu, husik nia feen oan kiak sira, tanba ne’e Estadu tenke tau matan ba sira,” nia dehan.
