Instituto Nacional da Defesa dos Direitos das Crianças (INDDICA) halo atividade sensibilizasaun kona-ba traballu infantílba komunidade sira iha Munisípiu Ainaro, Munisípiu Bobonaro, Munisípiu Covalima, Munisípiu Manatutu, Munisípiu Manufahi, Munisípiu Lautem, Munisípiu Liquiçá, Munisípiu Viqueque no inklui RAEOA.
Presidente INDDICA Dinorah Graradeiro hateten, atividade sensibilizasaun ne’e la’o tiha ona no nafatin husu ba inan-aman iha munisípiu sira atu bele tau-matan nafatin ba labarik sira atu labele hala’o atividade ema boot nian.
“Ita-nia atividade sensibilizasaun etapa ba etapa iha Munisípiu Ainaro, Kovalima, Manatuto, Manufahi, Bobonaro no sei iha tan tuir mai maka ba munisípiu Viqueque, Lautem, Lquiçá, no RAEOA,” dehan Prezidente INDDICA Graradeiro iha Hotel Timor, Díli.
Nia dehan, INDDICA halo sensibilizasaun ne’e foka liu ba asuntu Konvensaun Direitu Labarik, Padrão Legal sira ne’ebé mak eziste ne’e, inklui Lei Protesaun Labarik.
“Ita mós ko’alia kona-ba oinsá atu proteje labarik sira husi violénsia online. Ita mós ko’alia uituan kona-ba tráfiku umanu no traballu infantíl rasik.
Matéria ne’ebé ita halo sensibilizasaun ba komunidade, ita-nia targetu mak inan-aman, tanba sira mak sai primeira pesoa ne’ebé iha papél tomak atu fó protesaun ba labarik ida iha família,” nia informa.
Nia dehan, aleinde inan-aman no segundu mak autoridade lokál, ne’ebé mós hanesan reprezentante estadu nian iha komunidade nia le’et, sira tenke hatene atu sira mós bele fó protesaun, datoluk labarik sira rasik.
Iha sorin seluk reprezenta inan-aman, Maria da Costa Suku Fatuhada Postu-Adminitrativu Dom Aleixo hateten, la simu wainhira hare’e labarik sira ne’ebé fa’an sasan iha dalan ninin iha Timor-Plaza.“Oan ne’ebé fa’an sasan iha dalan ninin ho idade ki’ik la merese atu fa’an, tanba sei ki’ik oan sira presiza atu halimar no aprende estudu no prepara sira-nia a’an oinsa atu aprende iha eskola,” nia dehan.
