Komandu Falintíl Forsa Defesa Timor-Leste (F-FDTL) ho Defence International Training Centre (DITC) nafatin fó prióridade formasaun lian Inglés ba mílitar sira hodi bele partisipa iha kursu sira iha nível internasionál.
Reprezentante Xefe Estado Maior General F-FDTL Coronel Guido de Oliveira dehan, membru sira presiza tebes atu iha koñesimentu di’ak ba lian Inglés atu nune’e hodi responde ba oportunidade hirak ne’ebé parseiru sira oferese kona-ba kapasitasaun rekursu umanu militár iha rai-liur.
“Komandu F-FDTL nafatin servisu hamutuk Defence International Training Centre husi Australia nafatin fó prioridade ba formasaun lian Inglés ba militár sira hodi responde ba formasaun sira iha nivél interbasionál no diaspora,” nia dehan.
Nia dehan, formasaun lian Inglés ne’e realiza iha Centro Instrução Comandante Nicolau Lobato Metinaro ho objetivu hodi hasa’e koñesimentu membru sira-nian ba lian Inglés hodi responde ba nesesidade instituisaun F-FDTL nian.
“Dadaun ne’e militár hamutuk 97 pessoas maka frekuenta hela kursu lian Inglés iha Metinaro. Husi númeru ne’e, militár 37 maka gradua ona kompostu husi 11 iha nível 5 no 14 husi nível 6, inklui na’in 12 iha nível 5 ne’ebé mai husi Komponente Naval nian,” nia informa.
Nia hatete, rezultadu sira ne’e hatudu ona rezultadu pozitivu ba iha dezenvolvimentu rekursu umanu iha instituisaun F-FDTL.
Entretantu Asistente Adido Defeza Autraliano Tenente Coronel Philip hatete, lian Inglés mak lian ofisial ba ASEAN, no sai baze ba ema hotu hodi responde ba oportunidade iha nivel internasionál.
Nia dehan, Programa Lian Inglés sai ezemplu klaru ida kona-ba saida mak bele hetan bainhira F-FDTL no DITC servisu hamutuk ho objetivu ida de’it.
“Di’ak tebes atu haree militár Timor-oan no Austrália servisu hamutuk, fahe sira-nia paixaun atu dezenvolve lian Inglés, hodi fasilita soldadu Timor-oan sira viajen ba kursu internasionál sira, uza sira-nia abilidade lian Inglés iha konferénsia Nasoens Unidas, kursu engenharia, marítimu, Defence International Training Centre, no kursu promosaun iha Austrália,” nia informa.
Alende ne’e nia dehan, daudaun ne’e iha soldadu Timor-oan na’in ne’en (6) ne’ebé estuda iha Royal Military Duntroon, sira-ne’e hotu graduadu husi College Programa Lian Inglés.
“DITC-TL orgullu atu suporta Programa Lian Inglés ba F-FDTL iha exérsitu, mariña no forsa Aérea,” nia salienta.Nia dehan, iha tinan 2026 lara, Autoridade Nasional Marítima husu DITC-TL atu fornese treinamentu lian Inglés ba pessoal hodi dezenvolve sira-nia lian Inglés no programa refere úniku, no Timor-Leste mak nasaun ida de’it iha programa DITC neʼebé investe iha dezenvolvimentu lian Inglés liuhusi sala-aula.
