Ajénsia Dezenvolvimentu Nasionál (ADN) iha Ministériu Planeamentu Estratéjiku (MPIE) identifika ona eskola sira iha territóriu laran hamutuk atus-ida-haatnolu-resin-lima (145) mak dadaun ne’e kondisaun aat no presiza halo konstrusaun foun.
Diretór Ezekutivu ADN, Januario Maia Guterres dehan, ADN nia servisu mak halo minitorizasaun ba projetu sira nune’e halo identifikasaun ba infraestrutura públiku sira iha territóriu laran nune’e bele hadia fila fali bainhira kondisaun aat ona.
“Ba iha área edukasaun nian ita identifika eskola hamutuk 145 mak kondisaun grave no presiza halo kontrusaun foun no balun halo reabilitasaun.
Eskola hirak ne’e presiza urjentemente atu hadia tanba risku tebes ba estudante no professor sira nia vida,” Diretór Ezekutivu ADN Maia hatete.
Nia dehan, eskola 145 ne’e kompostu husi pre-eskolar, ensinu baziku-filial, ensinu báziku sentral no sekundariu jéral iha territóriu laran.
Nia dehan, dadus hirak ne’e aprezenta ona ba Ministériu Edukasaun (ME) nune’e bele aselera konstrusaun ba infraestrutura eskola hirak ne’e nune’e estudante no professor sira iha fatin seguru hodi realiza prosesu aprendisajen.
“Ha’u fó provas ida kona-ba eskola bázika Agapito da Costa iha Foho-Ailico ho eskola filial Caisero, iha Munísipiu Ainaro, ne’ebá kondisaun ne’ebé la di’ak,” nia informa.
Entretantu, Ministra ba Ministériu Edukasaun (ME) Dulse de Jesus Soares dehan, husi eskola 145 ne’ebé identifika kondisaun la di’ak ne’e iha eskola 50 mak hetan apoiu finanseiru husi governu Japaun hodi konstrui.
“Eskola 50 ne’ebé apoiu konstrusaun husi governu Japaun ne’e pakote kompletu ho fasilidade sira,” nia informa.Nia dehan, aleinde eskola 50 refere, eskola hamutuk 95 mak ME tau ona iha planu nune’e bele halo konstrusaun iha tempu besik maibe bazeia mós ba orsamentu.
