Biblioteka Infantíl iha Palácio Presidensia Repúblika (PR) Aitarak Laran Díli, hanorin labarik sira atu estuda no aprende hamutuk liuhusi atividade estra-kurrikulár sira ne’ebé oferese ho forma gratuita.
Diretora Biblioteka Infantíl Presidensiál Ana Isabel Gomes Amaral hateten, biblioteka refere oferese atividade estra gratuita, tanba haree ba labarik barak abandona de’it no labele aprende no bele ba iha fatin ne’e.
“Ami iha atividade estra sira hanesan artezenatu, aprende Inglés báziku, komputadór, joga bola, modelling, dansa, aprende oinsá halo dosi no sira ne’ebé seidauk hatene lee no hakerek mestre sira bele hanorin,” dehan nia.
Nia akresenta tan katak, sira oferese atividade estra kurrikulár barak tebes ba labarik sira ho tipu oi-oin nune’e sira aprende hotu sira bele aprezenta fila-fali sira-nia obra hirak ne’e iha atividade eventuál sira.
“Fundador ba projetu ida-ne’e mak Prezidente Repúblika Dr. José Ramos Horta. Projetu ne’e hahú iha tinan 2011 to’o agora kompleta ona 16 anos. Razaun loke projetu ne’e, tanba Prezidente lakohi labarik sira fila husi uma halimar de’it, nune’e haruka sira mai iha ne’e hodi aprende no halimar,” dehan Diretora Biblioteka Infantíl da Prezidensiál iha Aitarak-laran, Díli.
Nia dehan, durante ne’e iha labarik hamutuk atus-rua lima (205) mak asesu ba atividade sira no na’in 95 iha parte dader, enkuantu lokraik sira ne’ebé asesu hamutuk na’in 110.
Iha fatin hanesan Armando dos Santos nu’udar fasilitadór iha Biblioteka Infantíl hateten, estudante barak konsege aprende ho di’ak bainhira remata husi fatin ne’e hodi hatudu rezultadu ne’ebé di’ak.
“Ba labarik sira ne’ebé dadaun ne’e aprende iha fatin ne’e foun-foun sira mai seidauk hatene, maibé agora sira bele hatudu ba públiku liuhusi sira-nia atividade. Ne’e hanesan rezultadu di’ak ida ba labarik sira,” hateten nia.
Aleinde ne’e Netty Céu dos Santos nu’udar estudante husi Ensino Básico Marcelo II Comoro hateten, nia asesu Biblioteca Infantíl ne’e hodi partisipa iha atividade estra sira no aprende buat barak kona-ba respeitu inan-aman no hadomi ambiente liuhusi prodús buat foun ruma husi sira-nia kreatividade rasik ne’ebé sira aprende.“Ha’u sente kontente, tanba bele aprende buat barak hanesan aprende múzika, dansa, língua Inglés, Matemátika, Portugés, oinsá halo dosi, artesanatu kanta nsst. La’ós de’it ida-ne’e, maibé mestre sira mos hanorin ami atu respeitu inan-aman no hadomi ambiente liu husi keta soe foer arbiru,” dehan nia.
