Setór agrikultura iha Munisípiu Covalima kontinua hasoru dezafiu, liuliu iha área mekanizasaun agríkola, no tratór la sufisiente ba agrikultór sira iha atividade produsaun haré no ai-han seluk.
Diretór Agrikultura Munisípiu Covalima, Lino Magno, haktuir katak governu liuhusi programa SAPIP sira fó ona apoiu tratór ba agrikultór sira iha tinan kotuk, maibé realidade iha terrenu númeru tratór,seidauk sufisiente atu responde ba nesesidade agrikultór sira hotu, liuliu iha tempu plantasaun.
“Tratór ne’ebé agora ami iha hamutuk tolu-nolu-resin-tolu (33), maibé agora balun aat no halo hela manutensaun, lima mak aat total labele uza ona, tanba uza kleur ona. Entaun problema hirak ne’e la bele responde ba agrikultór hotu, tanba ne’e, ami kontinua husu governu atu aumenta tan tratór no hadia sistema manutensaun,” dehan Lino Magno, iha salaun Ministériu Agrikultura Pekuária Peska no Floresta (MAPPF), Comoro, Díli.
Nia akresenta tan katak, mekanizasaun agríkola atubele aumenta, tenki fasilita prosesu kuda haré, redús tempu servisu manual, no fó oportunidade ba agrikultór sira atu aumenta área plantasaun.
Iha sorin seluk Armindo Maia nu’udar agrikultór hateten komunidade lokal sente direta impaktu husi falta ekipamentu ne’e, tanba númeru tratór ne’ebé limitadu, dala barak halo sira atraza iha tempu kuda haré.
“Ami hein ho esperansa atu bele uza tratór, maibé tanba limitadu, ami tenke hein. Bainhira to’o, tempu plantasaun dala barak tarde ona, ida-ne’e bele afeta rezultadu kolleta nomós renda família,” hatete Armindo.
Nia hatutan agrikultór sira iha vontade boot atu servisu no aumenta produsaun, maibé falta apoiu iha área ekipamentu modernu sai hanesan obstákulu boot ba sira atu dezenvolve.
Iha parte seluk Ministru MAPPF Marcos da Cruz, hatete, ministériu durante ne’e halo ona distribuisaun tratór ba kada munisípiu sira inklui mós Munisípiu Covalima tuir planu nasionál no nesesidade lokal.
“Ami kompriende preokupasaun agrikultór sira, durante ne’e, MAPPF halo ona distribuisaun tratór ba munisípiu sira inklui mós Munisípio Covalima no sei kontinua halo tan. Maibé prosesu ne’e presiza tempu, tanba limitasaun orsamentu no rekursu, iha planu atu aumenta tan iha futuru,” dehan Marcos da Cruz.Nia esplika katak prosesu ne’e bele halo lalais, tanba depende ba Orsamentu Jerál Estadu, akizisaun ekipamentu, no distribuisaun ne’ebé tenke halo ho planeamentu di’ak atu asegura utilizasaun efisiente.
