Academia Loriko Taekwondo (ALT) dadaun ne’e prepara ona atleta na’in-sanolu-resin-sia (19) atu kompete iha eventu nasional ne’ebé sei realiza husi Federasaun Taekwondo Timor-Leste (FTTL) iha loron 25 to’o 26 Abril 2026, iha GMT, kapital Díli.
Treinadór ALT Onzo Dias Miqueias hateten atleta sira hala’o hela preparasaun hodi partisipa iha eventu nasionál refere.
“Loríko prepara ona atleta sira hotu ne’ebé husi prestasaun tinan kotuk nian no atleta foun sira ne’ebé foin tama iha tinan ne’e. Ami nafatin prepara hela. Ami espera katak iha eventu ida-ne’e mai ho rezultadu ne’ebé pozitivu,” dehan Treinadór ALT iha Bebonuk, Díli.
Nia mós husu ba atleta sira atu prepara an didiak iha parte saúde no mentalidade atu hasoru eventu hodi kompete kualker tempu.
Reprezentante atleta ALT Septiana Fernandes Joaquim hateten prosesu treinu preparadu no prontu tuir eventu refere.
“Prosesu treinu preparadu ona, no ami prepara atu ba tun iha eventu, prontu atu ba halo rame iha GMT,” dehan Atleta Septiana.
Nia hatutan, hakarak sai vensedór tenki iha disiplina no rona saida mak coach ko’alia.
“Ami-nia esperansa ba eventu ida-ne’e, hakarak sai vensedór. Tan ne’e, treinu tenke iha disiplina, rona instrusaun husi coach no saida mak coach ko’alia, ita tenke halo tuir,” dehan nia.
Iha fatin seluk Prezidente Komisaun Organizadora husi Federacão Taekwondo Timor-Leste (FTTL), Roberto da Costa de Jesus hatete federasaun iha planu hodi produs atleta liuhusi eventu nasional no internasional, nune’e bele loke eventu kada tinan.
“Dadaun ne’e preparadu hotu ona, no iha klubu rua (2) ka tolu (3) maka rejistu ona ba eventu ne’e, seluk sei prepara sira-nia atleta,” nia dehan.
Nia salienta tan data ne’ebé federasaun deside ba realiza eventu kompetisaun nasionál iha Abril 25-26 ne’e, rekursu sira ne’ebé fasilita eventu ne’e mai husi Ministériu Juventude Desportu Arte no Kultura (MJDAC).
Iha fatin seluk Xefe Departamentu Kompetisaun no Selesaun Nasionál iha MJDAC Josefina Zeca Pinto hatete, governu liuhusi MJDAC apoiu orsamentu ba atividade Taekwondo nian hamutuk $70.000, hosi montante refere hetan aprova liuhusi proposta ba eventu nasional ho montante $30.000.
“Husi parte XI governu liuhusi MJDAC ami apoiu no oferese finanseiru ba FTTL atu realiza kampionatu nasional iha tinan ida-ne’e nian. Tuir planu MJDAC nian ami planea $70.000 ba atividade rua ne’ebé sei halo iha fulan ne’e no ida seluk iha 4 trimestre iha ikus liu.
Husi totál orsamentu ida-ne’e ami hetan proposta husi Taekwondo rasik ba iha eventu agora iha dia 25-26 fulan Abril ne’e hamutuk $30.000 husi parte tékniku sira MJDAC nian no responsável inklui ha’u rasik,” dehan Xefe Pinto.Nia hatutan, aleinde orsamentu, MJDAC apoiu 100% nomós prepara fatin inklui suporta materiál no fasilidade head guard (helm taekwondo) no karpet ne’ebé atleta sira sei uza.
