Sekretáriu ba Sekretariadu Estadu Florestas (SEF), iha Ministériu Agricultura, Pecuária, Pesca no Florestas (MAPPF), kontinua realiza asaun kuda ai-oan hamutuk rihun tolu atus-tolu tolunulu resin tolu (3.333) iha Munisípiu Aileu atu proteje no redus degradasaun ambientál iha área sira ne’ebé identifikadu vulnerável.
Sekretáriu SEP, Fernandino Vieira da Costa, hatete ai-oan ne’ebé kuda iha área ho luan to’o hektár 3, ho total ai-oan 3.333 ne’ebé kompostu husi espésies oioin inklui ai kasia mangium, kayu putih no casuarina.
“Se la iha asaun konkretu hodi proteje floresta, sei mosu problema boot hanesan erosaun, rai halai no dezastre naturais seluk ne’ebé bele afeta diretamente moris komunidade,” dehan Fernandino iha Suku Seloi Kraik, Postu-Administrativu Aileu Vila.
Nia esplika katak degradasaun floresta kontinua aumenta, tanba atividade ema nian hanesan tesi ai ilegal, uza rai la sustentável no mudansa utilizasaun rai, ne’ebé lori impaktu negativu ba ekosistema.
SEF mos subliña katak floresta iha papél importante iha protesaun rai, bee no klima, ho jestaun ne’ebé di’ak, tanba floresta bele ajuda prevene inundasaun, rai monu no mantéin siklu hidrolójiku, liuliu iha área foho leten hanesan Munisípiu Aileu.
Nia hatutan katak servisu konservasaun floresta la’ós de’it responsabilidade governu, maibé presiza envolve mós komunidade atu hamutuk tau-matan ba ambiente.
“Programa ida-ne’e espera bele kontribui ba rekuperasaun área degrada no aumenta kualidade ambientál iha Munisípiu Aileu, liuliu iha prevene estragus ambientál iha futuru,” nia afirma.
SEF reafirma katak sei kontinua implementa programa reflorestasaun iha munisípiu sira seluk hodi asegura protesaun floresta no sustentabilidade ambientál iha Timor-Leste.
Iha parte seluk, Diretór Agrikultura Munisípiu Aileu, Pedro dos Santos da Silva, dehan inisiativa kuda ai-oan ida-ne’e importante tebes atu suporta sustentabilidade ambientál no agrikultura iha munisípiu refere.
“Reflorestasaun la’ós de’it proteje ambiente, maibé mós ajuda hadia kualidade rai no mantein bee iha fonte sira ne’ebé importante ba atividade agrikultura. Ida-ne’e sei fó benefísiu direta ba agrikultor sira iha Aileu,” dehan Pedro.Nia mos hatete katak kolaborasaun entre SEF no autoridade lokal sai fator importante atu garante programa reflorestasaun bele lao ho di’ak no kontinua iha futuru.
