Ministério Edukasaun salienta katak profesór sira ne’ebé hanorin iha Ensino Pre-eskolár tenke iha koinesimentu di’ak iha área pedagójia nian.
Diretór Nasionál Edukasaun Pre-Eskolár Domingos Belo Soares, hatete, ME servisu ho Marry Mackillop Today atu fasilita formasaun hodi hasa’e koñeseimentu ba profesóres pre-eskolár liu-liu munisípiu Dili ni’an kona-ba pedagojia, liuhusi Programa Hanorin no Aprende (Haap) nian.
“Programa ida-ne’e ajuda tebes profesór pre-eskolár sira hodi hasa’e sira-nia koñesimentu di’ak liutan iha área pedagojia liu-liu iha numerasia, literasia no fonétika nian,” nia saliente.
Nia dehan, programa ida-ne’e, atu atrai labarik sira ba eskola hodi aumenta matrikula ba labarik sira hodi atinji metas edukasaun nian, liu-liu iha pre-eskolár.
“Formasaun ita fó ne’e la signifika katak ita-nia profesór pre-eskolár sira laiha koñesimentu hodi hanorin ita-nia estudante sira. Maibé ministériu iha obrigasaun hodi kontinua fó formasaun ba ita-nia profesór sira hodi kuntinua eleva liutan kapasidade ne’ebé sira iha hodi forma estudante sira,” Diretór Nasional Pre-Eskolár Belo hatete.
Nia dehan, formasaun ne’e sei la realiza de’it iha Díli, maibé sei ba mós iha munisípiu sira hotu.
Entretantu Jestora Marry Mackillop Today, Agustinha Ximenes dehan, formasaun aplikativu ida-ne’e la servisu mesak, maibé servisu hamutuk ho ME no parseria sira hotu.
“Ita agora moris iha era teknolojia nia laran, ita tenke hakat ba oin no la’o ba oin ho buat foun. Ita fiar katak, ho formasaun kona-ba programa Haap ne’e bele eleva kualidade edukasaun liuhusi profesór sira utiliza ekipamentu no materia ne’ebé sira hetan ona iha formasaun ne’e hodi utiliza ho di’ak hodi dada mós labarik sira barak liu tan iha eskola,” nia informa.
Iha parte seluk Profesora Terezinha do Meninho Jesus husi eskola Pre-Eskolár Amigo de Jesus hatete, profesór sira presiza tebes formasaun sira hodi bele muda maneira hanorin estudante sira, no maneira foun.
“Ita atu atrai estudante sira-nia partisipasaun iha aula liu-liu iha nivel pre-eskolár profesór sira tenke iha kria meiu oin-oin kada loron, nune’e mós ami tenke iha pasensia hodi halo tuir sira-nia hakarak,” nia hatete.
Nia hatete, maneira ne’e durante, sira aplika iha eskola mak aprende ho halimar tempu rua ne’e tenke fahe hanesan atu nune’e sira labele tauk no vontade nafatin atu aprende. Espera katak husi programa Haap ne’e bele kuntribui liutan ba aumenta matrikula iha eskola liuhusi esforsu ne’ebé profesóres sira iha.Enkuantu total profesór ne’ebé tuir formasaun hamutuk tolunulu resin- neen (36) mak, kompostu husi escola pre-eskolár sanulu resin-neen (16) iha munisípiu Dili.
