Governu Japaun liuhusi Embaixada iha Timor-Leste prontu apoiu Timor-Leste (TL) hodi kombate krime transnasionál inkliu jogu ilísitu.
Embaixadór Japaun iha Timor-Leste, Yasushi Yamamoto, dehan servisu kooperasaun entre Timor-Leste no Japaun iha área seguransa durante ne’e la’o di’ak loos liu-liu iha kapasitasaun ba membru Polísia Nasional Timor-Leste (PNTL) sira.
Nia hatete, ba oin sei haree fila fali no reforsa fila fali kooperasaun ne’e iha área prevensaun ba krime transnasionál sira ne’ebé mak risku tebes ba Timor-Leste.
“Governu Japaun prontu apoiu Timor-Leste hodi kombate krime transnasionál nune’e mós jogu ilísitu ne’ebé mak dadaun ne’e buras iha territóriu laran,” nia informa.
Nia hatete, governu Japaun iha komitmentu servisu hamutuk atu promove konseitu seguransa hodi asegura dezenvolvimentu ekonómiku iha nasaun ne’e.
“Ida-ne’e interese koletivu atu promove kooperasaun rejional hodi kombate krime no tráfiku umanu husi autór rede krime organizadu sira, hodi garante katak TL livre husi aktu krime transnasionál sira,” nia salienta.
Alende ne’e nia dehan, dadaun ne’e sira mós realiza hela projetu balun iha TL, tanba ne’e sira kontinua diskute halo komunikasaun di’ak nune’e bele hametin kooperasaun di’ak entre Japaun no Timor-Leste.
Iha fatin hanesan, Ministru Ministériu Interior Francisco da Costa Guterres dehan, ko’alia kona-ba haforsa setór seguransa liu-liu kooperasaun bilaterál entre nasaun rua hodi hametin servisu seguransa iha futuru liu-liu kona-ba prevensaun krime transnasionál sira.
“Loos duni, entre Japaun no Timor-Leste, ita iha kooperasaun ne’ebé di’ak tebes iha área polísial nian hanesan Unidade Polísia Marítima (UPM) inklui mós polísia komunitária,” nia informa.
Nia hatete, daudaun ne’e Timor-Leste mós sai ona membru ASEAN nian, entaun presiza ajusta mós lista krime transnasionál ne’ebé envolve jogu online ilegal, krime sibernétika, nune’e Japaun hakarak atu suporta Timor-Leste iha área ida-ne’e.
“Apoiu ne’ebé sira sei halo mak formasaun ba membru PNTL (Polísia Nasionál Timor-Leste) no Unidade Polísia Marítima (UPM) inklui formasaun ba ofisiais PNTL sira iha futuru nune’e ekipamentu prevensaun balun ne’ebé presiza,” Ministru MI Guterres informa.Nia dehan, apoiu ida-ne’e nesesáriu tebes, tanba krime transnasionál ne’e ameasa tebes Timor-Leste, atu kombate presiza apoiu husi parseiru sira liu-liu hanesan Japaun.
