Eskola Pre-Eskolár tolu (3) inklui Eskola Pre-Eskolár Kaibada, iha Munisípiu Baucau, Pre-Eskolár Ainesi Munisípiu Manufahi, no Pre-Eskolár Fahisoi, iha Munisípiu Aileu, hetan ona karteira eskola husi Ministériu Edukasaun (ME).
Diretór Nasionál Edukasaun Pre-Eskolár, iha ME, Domingos Belo Soares dehan, eskola pre- eskolár 3 ne’ebé sai benefisiáriu ba karteira eskolár hirak ne’e, tanba identifikadu katak kadeira no meza ne’ebé antes ne’e sira utiliza kondisaun aat no la labele ona atu utiliza.
Nia hatete, ME liuhusi Diresaun Patrimonio no Lojístika nian halo distribuisaun karteira eskolár ba eskola hirak ne’e.
“Eskola Pre-Eskolár tolu hanesan, Kaibada, Ainesi, Fahisoi dadaun ne’e hetan ona karteira eskolár husi Ministériu Edukasaun,” nia informa.
Nia hatete, eskola tolu ne’e antes ne’e eziste ho estatutu privadu maibé dadaun ne’e intrega ona mai ME no sai ona eskola públiku.
“Husi eskola tolu ne’e hetan karteira eskolár ho totál la hanesan tanba bazeia ba total estudante iha eskola ida-idak,” nia saliente.
Nia hatete, pre-eskolár Kaibada hetan karteira eskolár hamutuk 40 Ainesi, 35, no Fahisoi 44, bazeia ba númeru estudante ne’ebé eziste iha eskola.
Enkuantu nia dehan, Ministériu Edukasaun sei kontinua identifika pre-eskolár sira ne’ebé laiha karteira eskolár nune’e bele kontinua distribui mobiliáriu eskolár ba eskola sira iha territóriu nasionál.
Entretantu Koordenadór Rede Edukasaun Timor-Leste Coalition for Education (TLCE) Jose Monteiro dehan, eskola pre-eskolár sira ne’ebé esziste ho estatutu públiku ne’e maioria ekipamemtu prosesu aprendizajen ne’e lakompletu kompara ho pre-eskolár privadu sira.
“Ita husu atu ME tenke tau prioridade hodi kria kondisaun ba iha pre-eskolár sira liu-liu públiku sira, tanba maioria povu ai-leva nia oan aprende iha pre-eskolár públiku,” nia husu.Nia dehan, pre-eskolár ne’e tenke kompleta ekipamentu briquedos sira hanesan animal, ai no ai-funan, kores, bola, no karta oan sira, tanba iha pre-eskolár ne’e tempu aprende no halimar nian.
