Presiza Lei Espesífiku Hodi Regula Komunidade Soe Lixu Arbiru 

Autoridade Munisípiu Díli presiza kria lei espesífiku ida hodi regula no fó sansaun ba komunidade sira ne’ebé soe lixu arbiru iha fatin públiku sira, no iha bairo.

Prezidente Autoridade Munisípiu (PAM) Díli Francisco do Santos hatete, maské iha ona lei númeru 33/2008 no alterasaun segundu iha dekretu lei numeru 3/2024 ko’alia kona-ba hijene ordem públiku nian, iha lei ne’e ordem públiku nian mak klaru, maibé kona-ba ijiene liu-liu lixu nian seidauk klaru.

“Ita presiza lei espesífiku ida atu bele implementa hodi regula no fó sansaun ba komunidade sira ne’ebé soe lixu arbiru iha fatin públiku no bairru,” nia salienta.

Nia hatete, lei ijiene no ordem públiku, liu-liu iha hijene nian ko’alia jeral de’it katak se mak soe lixu arbiru sei aplika sansaun multa $ zero to’o dolar atus-lima (500), maibé presiza tan lei komplementar ida hodi espesifika katak ezemplu soe foer masa ida arbiru nia hetan multa hira ne’e seidauk klaru.

“Lei espesífiku ne’e iha ona prosesu no Autoridade Munisípiu Díli sei eziji ba governu sentral para bele finaliza lalais projetu lei ne’e no entrega mai ami hodi implementa,” PAM Santos hatete.

Nia informa dekretu lei ne’e finaliza Autoridade Munisípiu Díli liu-liu kona-ba sansaun multa ba ema sira ne’ebé soe lixu arbiru iha fatin públiku sira hanesan jardim no dalan públiku sira maske lixu fatin governu prepara ona.

“Ita haree iha jardim sira hanesan Motael, Palásiu oin no Kristu-Rei, ne’e vizitante sira han hemu hotu lixu soe hela iha fatin no lalori ba iha lixeiru, liu-liu iha fim-semana,” nia hatete.

Nia dehan, fó hanoin nafatin ba komunidade atu hatoman an soe foer iha lixu bainhira iha dalan públiku no jardim sira no labele soe arbiru.

Enkuantu dadaun ne’e Autoridade Munisípiu Díli koloka ona lixu fatin hamutuk atus-hitu-sia-nolu-resin-sia (793) iha jardim no estrada públiku sira iha kapital Díli.

Entretantu Xefe Suku Kaikoli Hipolito Marques Sarmento hateten, parte Caicoli sempre akontese inundasaun, tanba kontribui husi komunidade soe foer arbiru de’it maske iha Caicoli ne’e lixu fatin monta ona.

Nia hatete, dalaruma komunidade tau iha lixu, maibé animal asu mak ba foti sai foer hirak ne’e husi lixeiru no tempu udan bee lori ba hotu valeta ikus mai rezulta inundasaun.

“Atu aplika lei koima ba komunidade ne’ebé soe lixu arbiru, ha’u hanoin ida-ne’e nesesidade tebes atu kria no implementa, tanba komunidade barak mak to’o ohin loron seidauk iha konsiénsia soe foer iha fatin,” Xefe Suku Kaikoli Marques hatete.  Nia dehan, haree iha dalan públiku sira komunidade balun hemu bee aqua ka han rabisadu hotu lahatene lori aqua mamuk no rabisadu kulik hirak ne’e ba tau iha lixu maibé husik hela iha dalan, dalaruma mós soe ba valeta, tanba ne’e aplika lei hodi multa ne’e tenke aselera lalais hodi bele implementa.