Prezidente Bee Timor-Leste, Empreza Públiku (BTL-EP), Gustavo da Cruz, hateten katak instituisaun refere asina ona kontratu ho kompañia haat (4) atu implementa projetu bee moos ba uma-kain hamutuk 2.400 iha postu-administrativu haat, inklui iha Venilale, Laclo, Letefoho no Remexio.
“Sistema ne’ebé sei implementa ho sistema modernu, ne’ebé transforma sistema bee rural tradisionál ba sistema individual. Iha sistema ida-ne’e, kada uma-kain sei instala metru-kontador rasik, atu nune’e bele regula no monitoriza konsumu bee ho di’ak liu no garante distribuisaun ne’ebé efisiente, justa no transparante ba benefisiáriu sira hotu,” hateten Prezidente BTL-EP Cruz iha nia fatin servisu iha Caicoli, Díli.
Nia dehan, projetu 4 ne’e iha orsamentu hamutuk besik USD 2,6 millaun no sei benefisia diretamente uma-kain hamutuk 2.400 ho populasaun estimada ema 13.500 resin.
Relasiona ho implementasaun projetu, Diretor Cruz hateten katak BTL-EP kontinua halo monitorizasaun no avaliasaun regular atu asegura projetu sira ne’e lao tuir planu ne’ebé estabelese ona.
Nia mós subliña katak durante implementasaun bele mosu dezafiu oioin, inklui problema tékniku no sosial.
“Iha aspetu tékniku, implementasaun projetu sei realiza liuhusi pakote 2 ka 3, depende ba tipu sistema bee ne’ebé sei uza. Ba sistema simples, sei iha pakote 2, mak análize no instalasaun tanke rezervatóriu.
Sistema ne’ebé uza bee rai-okos sei iha pakote 3 mak perfurasaun bee, instalasaun tanke rezervatóriu no instalasaun rede kanalizasaun. Ezemplu ida mak projetu iha Laleia, ne’ebé komponenti sira implementa ketak tuir natureza servisu nian,” nia afirma.
Iha parte seluk, Administradór Postu-Administrativu Remexio, Jacinto Mendonça, hato’o katak komunidade iha área refere kontente ho implementasaun projetu bee moos ida-ne’e.
Nia dehan katak durante tinan barak, aldeia balun iha Remexio hasoru difikuldade boot atu asesu bee moos, liuliu iha tempu bailoron.
“Projetu ida-ne’e importante tebes ba ami-nia komunidade, tanba sei ajuda hadia kondisaun moris, liuliu iha área saúde, saneamentu no bem-estar família sira,” dehan Mendonça.Nia espera katak implementasaun projetu sei lao tuir planu no tempu ne’ebé determina ona, atu komunidade bele hetan benefísiu ho lalais.
