Movimentu Feto Timor-Leste kompostu husi Rede Feto, Sagrada Família, Fokupers, Judisiál Sistema Monitoing Programa (JSMP) apoiu totál nomeasaun Komandante Natercia Eufrasia Martins ba segundu Komandante Jerál, tanba tempu to’o ona feto lidera instituisaun Polísia Nasionál Timor-Leste (PNTL).
Prezidente Rede Feto Timor-Leste (RFTL) Zelia Fernandes dehan, desizaun nomeasaun Komandante Natercia Eufrasia Martins ba segundu Komandante Jerál PNTL ne’e hatudu progresu di’ak iha estadu direitu demokrátika, feto no mane iha kompeténsia no kargu sira liu-liu iha instituisaun seguransa.
Nia hatete, kona-ba kapasidade lideransa no hola desizaun laiha duvida, tanba antes ne’e nia sai ona Komandate Polísia Munisípiu Ermera, Liquiça no Díli, sai mós Komandante Administrasaun iha Komandu Jerál nomós sai Diretór Jerál Servisu Migrasaun nian.
“Husi esperiénsia hirak ne’e hatudu katak tempu to’o ona feto lidera instituisaun PNTL,” nia dehan.
Nia hatete, komandante Natercia hatudu kompeténsia feto nian, no hetan konfiansa husi Komandu Jerál no governu hodi sai segundu Komandante Jerál PNTL ba tinan 2026-2029.
“Alende Komandante Natercia Eufrasia Martins iha mós feto polísia balun ne’e iha la haree hetan hanesan kamandante Unidade Polísia Vunerável no Komandante Polísia Komunitária sira mesak iha kapasidade hotu hodi okupa kargu xefia sira,” nia hatete.
Nia dehan, dadaun ne’e momentu ida di’ak tebes atu haree katak feto bele lidera instituisaun seguransa. Tanba ne’e movimentu feto kontinua fó apoiu ba servisu sira ne’ebé feto asumi iha PNTL.
Entretantu Segundu Komandante Jerál PNTL Komisária Natercia Eufrasia Martins dehan, diviza no konfiansa ne’ebé simu, la’ós hanesan oportunidade, maibé hanesan responsabilidade boot hodi serbí povu no nasaun.
“Ha’u apresia nafatin ba konfiansa, maibé hatudu nafatin responsabilidade seguransa ba povu tuir misaun PNTL nia rasik nomós bazeia ba Filozofia Polísia nian,” nia dehan.
Nia dehan, hanesan móos feto iha dezafiu foun ida tan, oinsá atu haree ba gep sira ne’ebé feto sira hasoru, buka solusaun hodi rezolve, nune’e mós atu motiva feto ema jerál liu-liu iha PNTL.
“Atu hala’o nafatin knaar hanesan polísia kumpri no disiplina hodi serbí povu,” nia salienta.
Nia hatete, konfiansa ne’ebé nia simu hodi refleta ba misaun PNTL hanesan feto tenke kumpri tuir tarefa servisu ne’ebé deside ona.
