Kongregasaun Madre ALMA (Irmãs Asosiasi Lembaga Misionaris Awam) iha Bebonuk, iha kapital Díli, serbí ho domin boot no akompaña labarik sira ne’ebé ho kondisaun difisiensia sira.
Madre Superiora Kongregasaun Irmãs ALMA Díli, Madre Florencia Nebo Hokeng hateten, kongregasaun nia ezisténsia atu ajuda família sira hodi aprende simu no tau-matan ba labarik difisiente sira.
“Kongregasaun ALMA la hanesan konsegrasaun seluk, maibé ami-nia kongregasaun ne’e tau matan ba labarik defisiensia sira. Irmãs ALMA tama iha Timor-Leste iha fulan Marsu 2004.
Atividade sira mak fó edukasaun báziku, halo tratamentu simples, fó formasaun espiritual no morál, ajuda família sira atu aprende simu labarik difisénsia sira ho domin no tau-matan ba ema ki’ak sira,” dehan Madre Superior Hokeng.
Nia hatutan tan katak, kongregasaun iha mós eskola terapia ba labarik difisiente sira ho tipu oi-oin, hamutuk na’in 65 nomós sira ne’ebé iha asrama hamutuk na’in 25.
“Ami mós iha eskola terapia hanesan, fisioterapia (halo terapia isin), ortoterapia (halo terapia ba ruin), mental (problema kakutak), tunanetra (difisiente matan), Authisme (kondisaun neurolojia/ nia interasaun ho ema ladun iha no ladun koalia), 65 pessoas ne’ebé husi liur mak mai, barak mak authisme, problema mental, difisiénsia matan, problema iha koalia no difisiénsia fíziku.
Iha asrama sira 25 pessoas laos difisénsia hotu, maibé iha balun ne’ebé sofre broken home, down Syndrome no authisme,” dehan Madre Superiora Kongregasaun Irmãs ALMA.
Entretantu, Xefe Suku Bebonuk Alfredo da Costa hateten, Irmãs ALMA sira-nia atendimentu sempre trata ema hotu-hotu hanesan liu-liu ba labarik sira ho kondisaun difisiénsia.
“Ha’u apresia no louva tebes ho sira-nia atendimentu, tanba sira servidór hanesan bibi-atan no sira-nia servidór ne’e ita haree hanesan mós Jesus ne’ebé serbí ba nia eskolante sira katak, haree ema hotu-hotu hanesan nune’e mós labarik sira ho difisiente,” dehan Xefe Suku
Nia mós hatutan, konsellu suku iha ona planu hela atu servisu hamutuk ho kompaña sira iha área Bebonuk hodi ajuda mós kongregasaun irmãs ALMA kona-ba saida mak sira preokupa nune’e bele fó tulun atu proteje mós labarik sira ho kondisaun difisiénsia.
“Planu ida-ne’e onestidade konsellu suku nian liu-liu ba xefe aldeia 20 de Setembro suku Bebonuk nian liuliu haree ba saida mak Irmãs sira-nia preokupasaun.Ita tenta liuhusi meiu balun, fiar katak se la tinan ida ne’e, ita hein tinan oin fali ita sei haree kompaña balun iha área Bebonuk nian bele ajuda mós irmãs ALMA sira, atu halo atendimentu ne’ebé mak di’ak liután no fó tulun atu proteje mós labarik sira ho difisiente sira,” nia salienta tan.
