Sekretaria Estadu Toponímia no Organizasaun Urbana (SEATOU) komesa intensifika medida sira atu organiza no regula atividade komérsiu nu’laloir no batar iha área turístika Kristu Rei, iha kapital Díli.
Sekretáriu Estadu SEATOU, Germano Santa Brites, hateten katak medida refere bazeia ba nesesidade atu asegura ordenamentu urbanu, limpeza ambientál no preservasaun valor turístiku Kristu Rei nian, ne’ebé konsidera nu’udar símbolu importante ba Timor-Leste no destinu prinsipal ba vizitante nasional no internasionál sira.
“Kristu Rei tenke sai fatin turístiku ne’ebé limpu, ordenadu no seguru. Tanba ne’e, ita deside atu regula atividade komérsiu iha área ida-ne’e hodi proteje imajen no komfortu vizitante sira,” nia hatete ba jornalista sira.
Nia dehan katak governu hala’o ona avaliasaun iha terrenu no identifika katak atividade fa’an nu’lalor no batar iha área ne’e kontribui ba problema oioin, inklui akumulasaun lixu, fumasa no utilizasaun espasu públiku ne’ebé la organiza.
Tuir nia, medida ne’e la’ós atu taka oportunidade ekonomia ba vendedór sira, maibé atu reorganiza sira-nia atividade ba fatin ne’ebé apropriadu no legal. Governu liuhusi SEATOU prepara ona área alternativo, inklui rotunda besik rezidénsia Prezidente Repúblika nian, atu akomoda vendedór sira ne’ebé hakarak kontinua sira-nia negósiu.
“Ita fó alternativa ba sira atu kontinua fa’an, maibé iha fatin ne’ebé ita prepara ona. Nune’e bele ajuda organiza cidade no mós fó oportunidade ba sira atu hetan rendimentu,” nia dehan.
Nia hatutan katak, maske medida ida-ne’e komesa ona implementa ho sosializasaun no orientasaun iha terrenu, autoridade sira observa katak sei iha vendedór balun ne’ebé kontinua viola regra no hala’o venda ilegal iha área Kristu Rei no fatin públiku seluk.
“Ita la bele kontinua tolera situasaun hanesan ne’e. Área turístika tenke iha padrãun limpeza no organizasaun ne’ebé di’ak,” SEATOU salienta.
Nia hatutan tan katak SEATOU sei kontinua hala’o fiskalizasaun regular no rigorozu iha terrenu, inklui koordenasaun ho autoridade relevante sira, hodi asegura implementasaun efetiva ba medida ne’ebé estabelese ona. No katak governu mós konsidera atu aplika sansaun administrativu ba ema sira ne’ebé kontinua la respeita regra sira.
“Ita sei aplika lei ho firmeza. Ema sira ne’ebé kontinua viola, sei hasoru konsekuénsia tuir regulamentu ne’ebé vigora,” nia hatete.
Iha parte seluk, vendedór ida iha área Kristu Rei, Armando do Rosário, hateten katak nia preokupa ho medida ne’ebé governu implementa, tanba afeta diretamente sira-nia rendimentu loron-loron nian.
“Ami komprende katak governu hakarak organiza no hadia fatin ne’e atu di’ak liu tan. Maibé ba ami ne’ebé depende ba fa’an iha ne’e, mudansa ida-ne’e difisil tebes tanba sustenta ami-nia família sira,” nia hatete.
Nia hatutan katak vendedór sira la kontra medida governu nian, maibé espera atu iha komunikasaun no solusaun ne’ebé konsidera parte rua. Tuir nia, lokal alternativa ne’ebé proposta tenke bele atrai kliente hanesan iha Kristu Rei.
“Se governu bele garante katak fatin alternativa ne’ebé fó ne’e di’ak no iha movimentu ema, ami prontu atu muda. Ami mós hakarak kolabora, maibé tenke iha solusaun ne’ebé justu,” nia dehan.Aleinde ne’e, nia husu ba governu atu fó tempu adaptasaun ba vendedór sira molok implementa medida rigorozu, atu nune’e sira bele prepara an no buka alternativa seluk ba sira-nia rendimentu.
