Komandu Falitil Forsa Defesa Timor-Leste (F-FDTL) dadaun ne’e prepara ona mílitar hamutuk na’in 57 hodi ba partisipa misaun apoiu paz Organização das Nações Unidas (ONU) bainhira presiza.
Reprezentante Xefe Estadu Maíor General F-FDTL Coronel Guido de Oliveira dehan, membru na’in 57 ne’ebé refere prepara ne’e liuhusi treinamentu kona-ba lideransa ofisial, operasaun matérial, táktika individual kombate nian, treinu koletivu kombate nian nune’e mós treinu ba operasaun manutensaun apoiu paz ONU nian.
“Ita prepara kedan ita-nia membru sira antes no bainhira ONU presiza ita preparadu no aranka de’it ona, hanesan antes ita halo ona ba ita-nia membru hirak ne’ebé mak ba partisipa ona misaun apoiu paz ONU nian,” Coronel Oliveira hatete iha Metinaru.
Nia dehan, membru hirak ne’e preparadu liuhusi treinamentu ne’ebé sira hetan liuhusi Defence Internationál Training Centre (DITPC) Timor-Leste nian durante fulan rua nian laran, tanba ne’e sira preparadu ona.
Aleinde ne’e nia hatete, durante ne’e iha ona militár na’in 11 mak ba hala’o ona misaun apoiu manutensaun paz ONU nian iha Libanu, Sudaun do Sul no nasaun seluk tan.
“Ita rekoñese katak ita-nia partisipasaun forsa iha ONU ne’e seidauk barak, tanba ne’e oportunidade ne’ebé mak Nova Yorke fó ita labele husik liu ida, haruka rua ka tolu mós ita tenke partisipa,” nia informa.
Iha parte seluk Diretór Fundasaun Mahein (FM), Nelson Belo dehan, komandu iha obrigasaun hodi prepara membru F-FDTL antes, hodi responde ba situasaun emerjénsia sira iha rai-laran nune’e mós ba apoiu paz nian iha rai seluk, bainhira hetan konvite husi ONU, atu nune’e sira bele servisu ho profesionalismu hodi lori benefisiu di’ak mai Timor-Leste.
“Misaun apoiu manutensaun paz ONU ne’e la’ós fasil, maibé defisil, tanba ne’e presiza iha peparasaun ne’ebé di’ak entermos de mentalidade fizika, kapasidade servisu ho vontade di’ak nune’e hodi hatudu profesionalismu hodi hamorin F-FDTL nia naran iha mundu internasional,” nia saliente.
Nia dehan, F-FDTL ba apoiu misaun paz ONU ne’e bei-beik ona maske ema ne’ebé mak ba partisipa ne’e ituan de’it bazeia ba konvite, maibé fiar katak komandu iha ona esperiensia naton hodi prepara membru sira.
“Liga ba esperiénsia ne’ebé iha ona sira bele prepara membru sira di’ak liutan kona-ba lala’ok apoiu manutensaun paz ONU nian,” Diretór Ezekutivu FM Belo salienta.Nia hatete, fiar katak membru ne’e sei hetan de’it ba apoiu paz ONU nian, maibé bele mobiliza ba iha kualker misaun ne’ebé ligadu ho operasaun, treinamentu ka ezérsísiu sira hodi hatudu katak jerasaun kontinuadór ida ne’ebé preparadu no professional.
