Faculdade de Ciências Sociais e Políticas (FCSP), iha Universidade Nacional Timor Lorosa’e (UNTL), nia fasilidade haris-fatin sei iha kondisaun la favorável ba estudante sira atu utiliza ba nesesidade bázika.
Estudante husi Departamentu Relações Internacionais iha FCSP, ho inisiál SX, hatete katak nia preokupa tebes ho kondisaun haris-fatin ne’ebé la favorável ba utilizasaun estudante sira nian. Nia dehan, durante tinan rua liubá nia no nia maluk sira kontinua hasoru problema hanesan.
“Kondisaun haris-fatin la’ós foin agora de’it, maibé desde tinan rua liubá ona estudante sira sempre preokupa ho problema ida-ne’e. Haris-fatin FCSP la’ós de’it aat, maibé la favorável atu utiliza tanba laiha manutensaun ne’ebé di’ak,” hatete nia.
Dekanu FCSP, Alarico da Costa Ximenes, hateten katak problema haris-fatin ne’e akontese tanba infraestrutura edifísiu ne’ebé utiliza atualmente seidauk projeta ho di’ak atu responde ba nesesidade estudante sira nian.
“Planu ne’ebé ami hato’o ona mak konstrusaun edifísiu foun ba FCSP, inklui haris-fatin ho padrãun ne’ebé di’ak liu. Bainhira ami simu vizita husi Pró-Reitór ba Asuntu Infraestrutura, ami hato’o ona problema hirak ne’e no hato’o mós nesesidade atu hadia fasilidade sira,” nia hatete.
Nia hatutan tan katak, se la iha mudansa ba planu ne’ebé agora dadaun iha, konstrusaun edifísiu foun sei implementa iha tinan 2027. Nune’e, estudante sira sei utiliza nafatin fasilidade atual durante tempu ne’ebé resta.
“Reitór mós promete ona katak bainhira kontratu aprovadu no implementasaun hahú, universidade sei rezolve problema haris-fatin ida-ne’e. Maibé ami seidauk bele garante tanba depende ba disponibilidade orsamentu no prosesu implementasaun,” nia dehan.
Entretantu, Pró-Reitór ba Asuntu Dezenvolvimentu no Infraestrutura UNTL, Alfredo Ferreira, hateten katak proposta konstrusaun edifísiu foun ba FCSP seidauk sai prioridade imediata ba universidade.“Atu halo konstrusaun foun presiza planeamentu no orsamentu boot. Dadaun ne’e ami simu pedidu husi Prezidente Asosiasaun Académica Estudantil (AAE) FCSP kona-ba problema hirak ne’ebé estudante sira hasoru, inklui haris-fatin ne’ebé kondisaun la favorável. Ami sei analiza no haree possibilidade atu responde ba nesesidade urjente sira ne’ebé estudante sira hato’o,” nia hatete.
