Estudante Preokupa Ho Estadu Zebra Cross Iha Dalan Públiku 

Estudante Universidade Nasional Timor-Loro’sae (UNTL) Feliz Paul Moniz preokupa sinais Tránzitu liu-liu zebra cross sira iha dalan públiku sira iha kapital Díli ne’ebé tinta lakon hotu ona no difikulta tebes ba ema atu ultrapasa.

Nia dehan, sinais zebra cross atu fó espasu ba ema hodi ultrapa iha dalan públiku sira husi dalan sorin ba fali sorin, maibé dadaun ne’e maioria zebra cross tinta moos hotu ona, no seidauk halo manutensaun.

“Ita preokupa tebes ba zebra cross sira ne’ebé tinta lakon hotu ona ne’e tanba fó ameasa tebes ba ema-nia vida bainhira ultrapasa iha zebra cross,” nia hatete.

Nia dehan, iha Palásiu Governu nia oin, iha Parlamentu Nasional nian, G7+ nian, iha Ministeriu Solidaridade nian, Colmera, Mandarin, 88, Kaikoli, Vila-Verde no fatin seluk tan iha estrada ne’e tinta zebra cross ne’e lakon hotu ona.

“Tinta lakon hotu ema la koñese ona katak iha fatin hirak ne’e iha zebra cross hodi fó oportunidade ema ultrapasa, motorista sira lahatene bainhira iha tama ona iha zebra cross sira mai lansadu de’it,” nia informa.

Nia dehan, situasaun hirak ne’e halo ema la seguru ultrapasa iha dalan públiku, tanba risku tebes ba ema nia vida. Tanba ne’e husu governu atu bele tau atensaun.

Iha parte seluk Zefriana Farinho da Costa dehan, sinais zebra cross ne’e hodi fasilita ema atu artavesa iha estrada tantu komunidade la’o ain no sira ne’ebé utiliza transporte.

“Bainhira zebra cross hirak ne’e lakon hotu ita la seguru atu ultrapasa iha estrada, ita haree hanesan akontesimentu iha tinan kotuk ema ida lakon vida bainhira ultrapasa iha zebra cross,” nia Informa.

Nia hatete, tuir loloos husi akontesimentu sira-ne’e governu tenke tau ona atensaun hodi pinta fila-fali zebra cross sira, maibé to’o ohin loron seidauk pinta.

Entretantu Ministru ba Ministériu Transporte no Komunikasaun (MTK) Miguel Marques Manetelo dehan,  problema zebra cross governu seidauk bele rezolve, tanba  orsamentu seidauk iha.

“Ita sempre buka maneira atu bele rezolve, ita ko’alia ona ho parseiru balun no sira prontu atu apoiu halo manutensaun ba zebra cross,” nia salienta.Nia informa, ekipa identifika ona zebra cross sira iha Díli laran lakon hotu ona nune’e mos iha munisípiu sira tanba zebra cross ne’ebé dadaun ne’e utiliza pinta ona iha tinan 2015-2016.