Ministériu Edukasaun (ME) dadaun ne’e implementa ona Programa Hafurak Eskola ba eskola sira iha área remotas iha rai laran hodi fasilita hadia ambiente eskola nian.
Diretora Nasional Ensinu Báziku iha ME, Estelita Soares dehan Programa Hafurak Eskola ne’e ministériu implementa liu-liu ba eskola ensinu báziku filial iha área rurais atu eduka estudante no manorin sira moris iha ambiente ne’ebé moos no ijiene, tanba eskola barak iha remotas ladun moos.
“ME implementa Programa Hafurak Eskola ne’e ba iha ensinu báziku filial iha área rurais ho objetivu atu eduka sira moris iha ambiente ne’ebé moos,” nia salienta.
Nia hatete, programa refere atu hadi’a aparénsia eskola nian, hanesan pinta ka halo reparasaun ki’ik sira iha sala laran ka iha li’ur, inklui mós organiza ho di’ak liu-tan materiál eskolár.
Nia haktuir tan, programa hare mós ba kestaun halo seguransa eskola nian sai metin liu-tan, no hadiak lutu eskola, no hadi’a resintu eskolár hodi bele hala’o atividade kurrikulár no estrakurrikulár.
“Programa ne’e realiza ho orsamentu hamutuk $2.500,00 (Rihun Rua, Atus Lima Dollares Amerikanu),” Diretora Soares informa valor rerefe ba eskola ida-idak.
Nia informa Programa Hafurak Eskola ne’e ba deit eskola públika sira no liu-liu ba EBF kiik sira iha área rural ho númeru alunus na’in 240 ka liu.
Entretantu, Koordenadór Ensinu Báziku Filial OE-LEU Maliana, Ananias de Lima Sequera dehan, programa hotu ne’ebé ME implementa kapaas tebes ba eskola iha área rural, maibé husu atu impelementasaun ho sériu.
“Ita haree programa barak mak governu implementa ona, maibé rezultadu la razoavel. Tanba ne’e ME atu implementa programa sira tenke identifika uluk lai benefisiu saida mak sei hetan atu nunee labele gasta osan,” nia informa.
Nia dehan, espera katak programa ne’ebé mak ME implementa, sira identifika ona benefisiu ba eskola sira.
“Ami-nia esperansa ba programa ne’e bele ajuda ami-nia eskola organizadu liutan, tanba ami mós sai benefisiáriu ba Programa Hafurak Eskola ne’e,” nia salienta.Nia hatete, hein katak programa ne’e bele kompleta eskola atividade eskolár no estrakurrikulár nune’e mós bele halo eskola sai seguru liutan.
