Autoridade de Inspesaun e Fiskalizasaun da Atividade Economica Sanitaria e Alimentar (AIFAESA) identifika loja balu iha Díli laran kontinua fa’an produtu ilísitu no sasan ne’ebé liu ona prazu, no konsidera situasaun ida-ne’e nudar problema sériu, tanba bele ameasa saúde públiku no viola direitu konsumidór sira iha Timor-Leste.
Sub-Inspetora Jeral AIFAESA, Quitéria da Costa hateten, tuir rezultadu inspesaun no monitorizasaun rutina ne’ebé autoridade hala’o, hetan produtu alimentár ne’ebé liu ona prazu no sasan ne’ebé tama ba merkadu la iha lisensa ofisiál.
“Iha monitorizasaun ne’e AIFAESA identifika duni sasan balun hanesan susun been ba labarik sira, no sasan sira seluk hanesan minuman ne’ebé liu ona prazu, estragadu no sasan ilisitu sira hanesan sigaru sira, ne’ebé tama ilegal, tanba ne’e AIFAESA sei la tolera sirkulasaun produtu ilísitu sira-ne’e iha merkadu.
Ba loja sira ne’ebé viola lei, tanba ne’e autoridade foti ona konvokatóriu atu loja nain sira-ne’e ba hatan iha AIFAESA, no aplika sansaun administrativa tuir regulamentu ne’ebé vigora,” hateten Quitéria da Costa hafoin halo monotorizasaun ba loja sira iha Postu-Administrativu Cristo Rei, iha kapital Dili.
Nia dehan, AIFAESA iha responsabilidade legal atu garante katak produtu hotu ne’ebé fa’an iha merkadu tenke seguru ba konsumidór no tuir padraun nasionál no internasionál. Tanba ne’e, autoridade kontinua halo inspesaun regulár iha loja sira, supermarkadu no fatin fa’an sasan seluk iha sidade Díli.
Nia hatutan aleinde inspesaun, AIFAESA mos hala’o atividade sensibilizasaun ba proprietáriu loja sira, hodi fó informasaun kona-ba obrigasaun legal no padraun seguransa produtu.
“Apela ba komunidade atu partisipa ativamente iha esforsu prevene sirkulasaun produtu ilísitu, liuhusi halo denúnsia ba autoridade kompetente se hetan loja ka fatin fa’an produtu ne’ebé suspeita la tuir lei,” nia afirma.
Nia dehan autoridade konsidera partisipasaun públiku hanesan elementu importante atu garante merkadu ne’ebé seguru, ordenadu no tuir lei, no iha tempu hanesan proteje saúde no seguransa komunidade iha Timor-Leste.
Iha parte seluk, konsumidór Alfredo Ornai hateten katak sirkulasaun produtu ilísitu iha merkadu halo konsumidór sira sente preokupa no la iha konfiansa tomak bainhira sosa produtu tanba dala barak konsumidór la iha informasaun sufisiente atu rekoñese produtu ne’ebé seguru no legal.
“Ami hakarak garantia katak produtu ne’ebé sosa la prejudika saúde. Governu no autoridade relevante presiza aumenta inspesaun no kontrolu iha merkadu, tanba ida-ne’e envolve saúde públiku,” hateten Alfredo Ornai.
Alfredo Ornai mos husu ba AIFAESA no autoridade sira atu intensifika kampaña edukasaun ba komunidade, hodi ajuda konsumidór sira kompriende oinsá atu haree rótulu, verifika data validade no rekoñese marka lisensa ofisiál, nune’e bele halo desizaun ne’ebé loos bainhira sosa produtu.
Nune’e mós parte seluk, Maneger loja JH-PLAZA Maria da Conceição hateten, buat hotu iha ona AIFAESA nia liman, sira-nia parte hein deit ba hatan tuir tempu ne’ebé sira fó ona.“Ami halo hela kontrola ba sasan sira-ne’e, maibé loja boot liu, entaun sasan tama mós barak, entaun susar ami atu halo kontrola to’o hotu, bainhira ami hasai mak ami hetan, entaun ami soe kedas. Maibé karik la hetan entaun ami labele hasai, maibé buat ne’ebé AIFAESA hetan ona, ami nafatin servisu hamutuk oinsa bele rezolve tuir regulamentu ne’ebé mak iha,” nia dehan.
