Governu liuhusi Ministru Planeamentu no Investimentu Estratéjiku (MPIE), kontinua halo esforsu atu atrai investimentu estranjeiru husi Xina ho Singapura iha área estratéjiku tolu hodi impulsiona dezenvolvimentu ekonomia nasional.
Ministru Planeamentu no Investimentu Estratéjiku, Gastão Francisco de Sousa, hatete katak governu koalia ho investór husi Xina no Singapura atu envolve sira iha área estratéjiku tolu, hanesan agrikultura, finansas no aviasaun.
“Iha área agrikultura iha produtu balun ne’ebé investór sira aprezenta, liuliu kona-ba espésie sira ne’ebé iha poténsia boot, hanesan fó hahan ba animál sira no prodús produtu seluk ne’ebé iha valór ekonómiku,” hatete Ministru MPIE Sousa ba jornalista sira iha Palásiu Governu, Díli.
Ministru MPIE hatete katak setór agrikultura iha papel importante loos iha dezenvolvimentu nasional, tanba bele kria empregu, aumenta produsaun lokal no garante seguransa ai-han. Nia dehan katak investimentu iha agrikultura mos bele ajuda moderniza sistema produsaun, inklui utilizasaun teknologia foun.
Nia dehan katak iha setór finansa atu dezenvolve sistema bankáriu no servisu finansas inkluzivu no hasa’e konfiansa investór no fasilita asesu ba kapitál, liuliu ba emprendedór ki’ik no médiu.
“Entaun ita bele haree investór sira mós aprezenta interese iha área finansiál, liuliu ba futuru, tanba governu estabelese Banku Dezenvolvimentu Nasionál. Ho nune’e, investór sira sei haree hamutuk prosesu no oportunidade ba sira-nia partisipasaun iha dezenvolvimentu setór finanseiru iha Timor-Leste,” hatete nia.
Ministru MPIE mos akresenta iha setór aviasaun, investimentu iha área ida-ne’e bele kontribui ba melhoria infraestrutura aeroportu, servisu aviasaun no hasa’e turizmu, ne’ebé iha poténsial boot atu sai hanesan fonte rendimentu alternativu ba nasaun.
Iha parte seluk, reprezentante delegasaun investór, Michael Ong, manifesta apoiu ba esforsu Governu Timor-Leste atu fó oportunidade investimentu ba investór husi rejiaun.
“Ami kontente, tanba konsege konvida Profesór Ling husi Xina atu ajuda ho transferénsia teknolojia Jintao, ne’ebé bele ajuda hasa’e kapasidade povu no kontribui ba dezenvolvimentu komunidade sira iha Timor-Leste,” dehan Michael Ong.Nia hatutan investór Rudy Huang manifesta interese atu investe iha área aviasaun, no sei halo diskusaun ho empreeza Aero Dili, inklui posibilidade halo investimentu iha indústria aviasaun. Aleinde ne’e investór Terence Wong husi Hong Kong mós halo ezaminasaun kona-ba mikrofinansa no sei servisu besik ho Ministériu Finansa.
