Ministru Ensinu Superiór, Siénsia no Kultura, (MESSK) husu Universidade privadu sira inklui Universidade da Paz (UNPAZ), Institute of Business (IOB), Universidade Dili (UNDIL), Universidade Oriental Timor-Lorosa’e (UNITAL), Dili Institute fo Tecnology (DIT), no Universidade Catolica Timorense (UCT) atu promove Língua Portugeza iha prosesu aprendizajen akadémika.
Ministru MESSK Jóse Honorio da Costa Pereira Jerónimo hateten, implementasaun kurríkulu padraun nasionál universitária ne’e kona-ba sistema unifikasaun padraun sistema kurikulár iha ensinu superiór no língua Portugeza.
“MESSK husu ba universidade sira liu-liu instituisaun privadu atu promove Língua Portugeza iha prosesu aprendizajen tuir kurríkulu haruka. Universidade hotu tenki aprende Língua Portugeza, tanba sai ona kurríkulu padraun nasionál,” nia dehan.
Nia hatutan atu promove Língua Portugeza ne’e MESSK koloka ona professor sira hodi reforsa hanorin ho Língua Portugeza iha universidade sira refere.
“Kona-ba universidade ne’ebé kontinua uza lingua Indonézia, ne’e labele ona uza lingua Indonézia iha universidade, tanba la’ós lingua ofisiál Timor-Leste nian, maibé língua negósiu nian,” Ministru MESSK Jerónimo informa iha UNTL, Díli.
Nia informa ba futuru sei haree, tanba língua Indonézia no Inglés hanesan língua traballu, la’os língua ensinu.
Entretantu, Koordenadór Rede Edukasaun Timor-Leste Coalition for Education (TLCE) Jose Monteiro dehan, tuir sira-nia observasaun dadaun ne’e iha universidade privadu sira hahu nakloke ona ba Língua Portugeza iha prosesu aprendizajen.
“Maibé sira nafatin utiliza língua Indonézia hodi halo esplikasaun ba materia ka rezumu ba materia sira, maibé ita haree sira esforsu ona hodi hanorin ho Língua Portugeza,” nia salienta.
Nia dehan, kona-ba proposta no monografia maioria universidade sira utiliza Língua Tetun hodi hakerek la’ós Língua Portugeza ka Indonézia.Nia dehan, atu solusiona problema universidade sira utiliza Língua Portugeza hodi hanorin MESSK tenke investe iha formasaun kapasitasaun ba língua ne’e ba dosente sira.
