Estudante sira iha territóriu laran tomak kompostu husi pre-eskolár to’o sekundáriu inklui Tékniku Vokasionál sira hahú utiliza ona uniforme nasionál eskolár.
Sekretáriu ba Sekretariadu Estadu Ensinu Sekundáriu Jerál no Tékniku Vokasionál (ESG-ESTV) Domingos Lopes Lemos dehan, uniforme nasionál ne’e kada nível eskolár diferente iha kor, ezemplu hanesan, ba eskola pre-eskolár uza kor matak no mutin, ba ensinu báziku uza mutin no lor-kafé, ba ensinu sekundáriu jerál uza azul eskuru no mutin enkuantu ba sekundáriu tékniku vokasionál uza kór metan no mutin.
“Estudante sira utiliza ona uniforme nasionál eskolár iha territóriu laran,” nia informa.
Nia hatete, ano letivu tinan 2025 ne’e terseiru trimestre estudante hotu-hotu husi pre-eskolár to’o ensinu sekundáriu jerál no tékniku vokasionál hotu tenke utiliza uniforme eskolár tuir nivel ida-idak nian.
“Estudante sira ne’ebé simu ona uniforme nasionál eskolár ne’e obrigatóriu tenke utiliza no sei laiha tan uniforme seluk,” Sekretáriu Estadu ESG-ESTV Lopes dehan.
Nia salienta, uniforme nasionál ne’e la’ós ba eskola públiku de’it, maibé ba mós eskola privadu sira, sei la autoriza tan uniforme eskolár seluk,” nia informa iha Eskola 4 de Setembru Balide, Díli.
Entretantu Diretór Eskola Ensinu Sekundáriu Jerál 4 Setembru, Martinho de Menezes hatete, uniforme eskolár nasionál ne’e parte ida hodi moderniza eskola iha Timor-Leste.
“Ko’alia kona-ba uniforme, ne’e di’ak tebes atu nune’e estudante hotu bele utiliza tantu eskola públiku no privadu bele organizadu ho uniforme ida de’it,” nia salienta.
Nia hatete, uniforme eskolár ne’e ministériu mak prepara modelu no kor depois inan-aman sosa no ohin ofisialmente entrega ba estudante sira hodi utiliza ba eskola.
“Hafasil inan-aman sira bele sosa ba oan sira utiliza ba eskola ho folin ne’ebé mak baratu,” Diretór Eskola ESG 4 Setembru Menezes dehan.Nia dehan, ba oin estudante hotu tenke utiliza ona uniforme nasionál eskolár foun no sei la utiliza tan uniforme tuan liu-liu iha Eskola ESG 4 de Setembru.
