Projetu alargamentu estrada foun iha área kaptial Díli laran ne’ebe afeta uma-kain 400, maibé prosesu kompensasaun ba proprietáriu sira seidauk remata tanba balun seidauk hatama dokumentu no mos balun la aseita ho tabela pagamentu husi governu.
“Husu nafatin iha uma sira ne’ebé dokumentu kompleta, ita selu hela. Maibé iha proprietáriu sira seluk mak seidauk kompleta dokumentu ka seidauk konkorda ho presu ne’ebé governu fó. Ita seidauk halo pagamentu tanba iha hela diskusaun ba presu hodi bele hetan solusaun,” Ministru Obra Públika, Samuel Marçal, hateten iha Hotel Timor, Díli.
Nia dehan, governu apela ba komunidade afetadu sira atu koopera no komprende situasaun, tanba kompensasaun presiza dokumentasaun legal kompletu, tanba iha parte komunidade balu dehan, sira-nia uma sira halo ho osan boot, no agora presu ne’ebé governu oferese la to’o valor ne’ebé sira investe ona.
“Nafatin halo negosiasaun ho komunidade, tanba ita komprende mós katak presu kompensasaun ne’e tenke permite hodi sira bele hadia fali uma sira nian ho kondisaun diak,” nia afirma.
Nia mos haktuir, Presidente Repúblika mós fó orientasaun atu projeta estrada foun sira ho modelo modernu, ne’ebé bele atrai turismu, no respeita mos identidade arkitetónika, inklui edífisiu istóriku tempu Português nian.
Nia promete, sei kontinua koordenasaun ho komunidade no halo esforsu atu remata prosesu kompensasaun no implementasaun projetu iha tempu los.
Iha fatin ketak, komunidade afetadu ba alargamentu estrada iha Suku Bebunuk, Postu-Administrativu Dom Aleixo, Município Díli, Maria dos Santos hatene, kompensasaun husi governu seidauk hetan maske dokumentu uma nian kompletu ona, no iha mós desakordu kona-ba presu ne’ebé fó.
“Ita boot sira dehan atu halo estrada di’ak, ami mós komprende. Maibé ita-nia uma seidauk simu kompensasaun, oinsá mak ami bele sai ho trankuilidade? Dokumentu kompletu, presu sira la refleta kondisaun sira,” nia hateten.
Nia dehan, kondisaun ne’e fó impaktu psikolojiku ba família sira ne’ebé seidauk hatene klaru loloos prespetiva kompensasaun nian. Moradór sira husu governu atu hatama klaridade no transparénsia iha prosesu, no fó prioridade ba komunikasaun regular.
Nune’e mós Xefe Suku Bebonuk Alfredo da Costa hateten, komunidade sira ne’ebé hela iha área mota laran ne’e seidauk hetan hotu osan kompensasaun ne’e to’o agora.
“Ha’u husu ba governu atu aselera lalais atu nune’e bele rezolve problema ne’e. Agora governu husu komunidade atu koopera hodi sai husi fatin sira-ne’e, maibé to’o agora ema sira-ne’e seidauk hetan osan ruma hodi hadia fali sira-nia uma.Ita la hatene ema sira ne’ebé mak sai husi ne’e balun ba ona hela iha foho, ida-ne’e hela ona iha uma diak ruma kalae, ita mos seidauk hatene, tanba ne’e hanesan autoridade lokal nafatin husu ba governu atu bele karik rezolve lalais tiha problema ida-ne’e,” nia dehan.
